अखबार नेपाल ट्रेन्डिङ

काठमाडाैं: खप्तड राष्ट्रिय निकुञ्ज १९८४ मा खप्तड बाबाको सल्लाहमा स्थापना भएकाे संरक्षित क्षेत्र हाे ।

खप्तड राष्ट्रिय निकुञ्जकाे मध्य भागमा अवस्थित खप्तडबाबा आश्रम एक प्रसिद्ध धार्मिक स्थल हो । यहाँ हरेक वर्ष श्रद्धालु भक्तजनहरु जनै पूर्णिमाकाे दिन भगवान शिवकाे पूजा आराधना गर्न आउँछन् र यस क्षेत्रमा ठूलाे मेला लाग्ने गर्दछ ।

खप्तड राष्ट्रिय निकुञ्ज पश्चिम नेपालको सेती अंचलमा अवस्थित छ। यस राष्ट्रिय निकुञ्जले डोटी, बाजुरा, बझाङ र अछाम जिल्लामा २२५ वर्ग किलोमिटर क्षेत्रफलमा ओगटेको छ ।

यस राष्ट्रिय निकुञ्जमा सैलेश्वरी, खप्तड बाबाकाे आश्रम, रामरोसन, बडीमालिका जस्ता प्रसिद्ध धार्मिक स्थल छन् । जहाँ हरियाली पहाड, पाटन, ठूला फाँट र खहरेहरुले सुसज्जित छ ।

निकुञ्ज संरक्षित क्षेत्रमा २२४ प्रकारका औषधीय जडिबुटीहरू ५६७ प्रजातिका फूलहरूको बोट, लालीगुँरास र विभिन्न प्रकारका रुख बिरुवाकाे जंगलले चारैतिर ढकमक्क ढाकेकाे छ ।

खप्तड राष्ट्रिय निकुञ्ज पंक्षी अवलोकनका लागि प्रसिद्ध छ। यस निकुञ्जमा बुलबुल, काेईली, चिल, डाँफे सहित २७० प्रजातिका चराचुरुङ्गी लगायत चितुवा, हरिण, जंगली कुकुर, घोरल, हिमाली कालो भालु, बाँदर, लङ्गुर, कस्तूरी मृग जस्ता अन्य धेरै जातका विभिन्न किसिमका जंगली जनावरहरू पाईन्छ ।

यस क्षेत्रमा मौसम गर्मीमा चिसो र सुक्खा हुन्छ र जाडोमा चिसाे र ओसिलो हुन्छ। गर्मीमा तापक्रम ० देखि २० डिग्री सेल्सियस सम्म हुन्छ, भने जाडोमा तापक्रम ० डिग्री सेल्सियस भन्दा तल झर्छ र हिउँले ढाकेकाे हुन्छ ।

यस निकुञ्जमा भ्रमणका लागि उपयुक्त समय शरद ऋतु असाेजदेखि मंसिर र वसन्त ऋतुमा फाल्गुणदेखि बैशाख महिनामा हाे । शरद ऋतुकाे समयमा विभिन्न चाडपर्वहरू आयोजना गरिन्छ भने वसन्त ऋतुकाे समयमा मौसम सफा हुने हँदा अपी र सैपाल हिम सृङ्खला अवलाेकन गर्न सकिन्छ ।

खप्तड राष्ट्रिय निकुञ्ज जानका लागि काठमाडौंबाट हवाई अथवा स्थलमार्ग हुँदै कैलालीबाट जान सकिन्छ । कैलालीकाे अत्तरिया चाेकबाट करिब ९ घण्टा स्थलमार्गकाे यात्रा पछि खप्तडको प्रवेशद्वार डोटी जिल्लाको सिलगढी बजार पुगिन्छ । सिलगढीबाट करिब २ दिनकाे पैदल यात्रासंगै खप्तड राष्ट्रिय निकुञ्ज पुग्न सकिन्छ ।