अखबार नेपाल ट्रेन्डिङ

काठमाडौं: अमेरिकाले नेपाललाई दिएको कोरोनाविरुद्धको फाइजर खोप १ लाख ६ सय २० डोज काठमाडौं आइपुगेको छ ।

यो खोप १८ वर्ष मुनि तथा १२ वर्षमाथिका बालबालिकालाई लगाइने स्वास्थ्य मन्त्रालयले जनाएको छ ।

खोप सीमित भएकाले तत्काललाई १२–१८ वर्ष समूहका दीर्घरोगीलाई मात्र दिइने मन्त्रालयका प्रवक्ता  डा. कृष्णप्रसाद पौडेलले जानकारी दिएका छन् ।

अमेरिकाका फाइजर र बायोएनटेक कम्पनीद्वारा उत्पादित फाइजर खोप अमेरिकाका १२ देखि १७ वर्ष उमेरका बालबालिकाले लगाइसकेका छन् ।

यसैबीच फाइजर–बायोएनटेक कम्पनीले ५ देखि ११ वर्ष उमेर समूहका बालबालिकामा गरिएको कोरोना खोपको परीक्षण पनि सफल भएको जानकारी दिएको छ ।

कम्पनीका अनुसार उक्त उमेर समूहको क्लिनिकल परीक्षणले खोप ९० दशमलव ७ प्रतिशत प्रभावकारी भएको पुष्टि भएको छ ।

खोप कार्यक्रम अन्तर्गत ‘२ हजार २ सय ६८ बालबालिका सहभागी गराइएको उक्त परीक्षणमा एकतिहाइलाई प्लेसेबो औषधि खुवाइएको थियो भने दुईतिहाइलाई खोप लगाइएको थियो’, कम्पनीद्वारा सार्वजनिक परीक्षण प्रतिवेदनमा भनिएको छ ।

परीक्षणका क्रममा संलग्न १६ जना बालबालिकामा गरिएको अध्ययनमा औषधि सेवन गराइएका १३ जनालाई कोरोना संक्रमण देखिएको थियो भने फाइजर खोप लगाइएका ३ जनालाई मात्र संक्रमण देखिएको थियो ।