अखबार नेपाल ट्रेन्डिङ

एजेन्सीः विश्व स्वास्थ्य संगठनले यूरोपमा कोरोना भाइरसको नयाँ लहर आउने र यसबाट आगामी डिसेम्बरसम्ममा कम्तीमा दुई लाखभन्दा बढी व्यक्तिको मृत्यु हुनसक्ने प्रक्षेपण गरेको छ ।

युरोपका खासगरी गरिब मुलुकमा कोरोना भाइरस विरूद्धको खोप दर कम रहेकोले प्रभाबकारी भूमिका निर्बाह गर्न नसक्ने विश्व स्वास्थ्य संगठन (डब्लुएचओ)ले चिन्ता व्यक्त गरेको छ ।

डब्लूएचओ युरोपका निर्देशक हान्स क्लजका अनुसार गत हप्ता मृत्युको सङ्ख्यामा ११ प्रतिशत वृद्धि भएको र एउटा विश्वसनीय अध्ययन रिपोर्टले युरोपमा डिसेम्बर १ सम्ममा थप दुई लाखभन्दा बढी मानिसको मृत्यु हुनसक्ने देखाएको जनाएको छ ।

युरोपले अहिलेसम्म १३ लाख कोरोना भाइरस सङ्क्रमितको मृत्यु भएको पुष्टि गरेको छ । यूरोपका ५३ सदस्य राष्ट्रमध्ये ३३ मुलुकले गत दुई हप्तामा कोरोना सङ्क्रमण दर १० प्रतिशतभन्दा बढीले वृद्धि भएको निर्देशक क्लजले जानकारी दिए ।

विशेष गरी विभिन्न देशहरूमा नियन्त्रणका लागि दिनुपर्ने प्राथमिक जनसंख्यामा अत्यन्तै कम रहेको कारण चिन्ताजनक अवस्था मानिएको हो ।

युरोपका लगभग आधा मानिसहरूलाई पूर्ण खोप लगाएको भएतापनि यस क्षेत्रमा खोप लगाउने कार्य अझै पनि सुस्त भएको जनाईएको छ ।

युरोपका निम्न तथा निम्नमध्यम आय भएका मुलुकका छ प्रतिशत मानिसले मात्र पूर्ण खोप लगाएका छन् । केही मुलुकले १० मध्ये एक स्वास्थ्यकर्मीलाई मात्र खोप दिएका छन् ।