अखबार नेपाल ट्रेन्डिङ

रामेछापः रामेछाप उमाकुण्ड गाउँपालिकामा पहिलो पटक पाँच शैय्याको कोभिड–१९ अस्थायी अस्पताल सञ्चालनमा आएको छ ।

नवनिर्मित पाँच शैय्याको अस्थायी अस्पतालको गाउँपालिकाका प्रमुख शेर बहादुर सुनुवार र उपप्रमुख उर्मिला कार्की बस्नेतले संयुक्त रुपमा उदघाट गरी अस्थायी अस्पतालबाट डाक्टर सहितको टोलीबाट सेवा सञ्चालनमा ल्याएको हो ।

कोरोना संक्रमणबाट आफै जोगिन आम नागरिकहरु सचेत हुनुपर्नेमा जोड दिँदै गाउँपालिका अध्यक्ष सुनुवारले दुर्गम जिल्लाको गाउँपालिकामा पनि जनताको सेवा गर्न आएका डाक्टर सहितका स्टाफ नर्सहरुप्रति आभार प्रकट गरे ।

अस्पताल उदघाटन कार्यक्रममा गाउँपालिकाका उपाध्यक्ष उर्मिला कार्की बस्नेतले अस्पताल सञ्चालनमा आएसँगै गाउँपालिकामा कोरोना संक्रमितले पाउने विभिन्न सेवा सुविधा सहितको उपचार डाक्टर नर्सहरुबाट उपलब्ध हुने बताए ।

यसैबीच अस्पताल उदघाटन समारोहलाई सम्बोधन गर्दै वडा नम्बर ४ का वडा अध्यक्ष मानबहादुर सुनुवारले छोटो समयमा नै नव निर्मित पाँच शैय्याको कोभिड–१९ अस्पतालबाट गाउँपालिकामा रहेका स्थानीय नागरिकहरु लाभान्वित हुने विश्वास व्यक्त गर्दै अस्थायी अस्पताललाई स्थायी अस्पतालमा परिणत गरिने बताए ।

यसैबीच अस्पतालका डा. पेमा देचेन गुरुङले उमाकुण्ड गाउँपालिकाका नागरिकहरुको सेवा गर्न आफू यहाँ आएको बताउँदै सकेको सेवा उपलब्ध गराउने प्रतिबद्धता व्यक्त गरे ।

उदघाटन कार्यक्रममा प्रमुख प्रशासकीय अधिकृत ईश्वरी प्रसाद सुवेदी, स्वास्थ्य शाखा प्रमुख दिपेन्द्र कुमार पैकरा, अस्पतालका कर्मचारी, कर्मचारी र स्थानीय नागरिक लगायतको उपस्थिति थियो ।