अखबार नेपाल ट्रेन्डिङ

एजेन्सी: अमेरिकाले चीनबाट आयात हुने सामानमा तत्काल भन्सार शुल्क नबढाउने भएको छ । अमेरिकाको व्यापारिक प्रतिनिधिको कार्यालयले चीनसँग जारी वार्ता सकारात्मक दिशामा रहेकाले तत्काल चिनियाँ सामानमा भन्सार शुल्क बढाउनु पर्ने अवस्था नरहेको जनाएको छ ।

अमेरिकी व्यापारिक प्रतिनिधिको कार्यालयले चिनियाँ सामानको आयातमा तत्काल भन्सार शुल्क नबढाउने औपचारिक घोषणा भने आगामी मंगलबार गर्ने अमेरिकी सञ्चारमाध्यमले जनाएका छन् । यसअघि अमेरिकाले जनवरी १ देखि चीनबाट आयात हुने २ खर्ब अमेरिकी डलर मूल्यका वस्तुमा लाग्दै आएको भन्सार शुल्क १० प्रतिशतबाट बढाएर २५ प्रतिशत पुरयाउने जनाएको थियो ।

तर, चिनियाँ राष्ट्रपति सी जिन्पिङसँगको वार्तापछि अमेरिकी राष्ट्रपति डोनाल्ड ट्रम्पले भन्सार बढाउने म्याद ९० दिन थपेका थिए । सो म्याद शुक्रबार मात्र सकिएको थियो । चीनले अवैधानिक व्यावसायिक अभ्यास गरिरहेको भन्दै अमेरिकाले चिनियाँ सामानमा भन्सार बढाउन लागेको थियो । यता चीनले भने आफ्ना सामानमा भन्सार नबढाउने अमेरिकी कदमको स्वागत गरेको छ । चीनको व्यापार मन्त्रालयले विज्ञप्ति जारी गर्दै अमेरिकी कदमको स्वागत गरेको हो ।।