अखबार नेपाल ट्रेन्डिङ

एजेन्सी: अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङबीच आजदेखि भियतनामको हनोइमा दोश्रो शिखर वार्ता हुदै छ । सिंगापूरमा पहिलो ऐतिहासिक शिखर वार्ता सम्पन्न भएको ८ महिना पछि किम र ट्रम्पबीच हनोइमा दोश्रो शिखर वार्ता हुन लागेको हो ।

किम र ट्रम्पबीच आज स्थानिय समय अनुसार साँझ साढे ६ बजे हनोइको सोफिटेल लेजेण्ड मेट्रोपोलमा वान ओन वान भेटवार्ता हुने छ । भेटवार्ताका लागि ५ बजेर ५५ मिनेट जाँदा ट्रम्पले जे डब्लु मेरियट होटल छाड्ने कार्यक्रम छ । दुइ नेताबीच साँझ ७ बजे सम्म वार्ताको मुख्य एजेण्डामा छलफल हुने अमेरिकी राष्ट्रपति कार्यलय ह्वाइट हाउसले जनाएको छ ।

वान ओन वोन वार्ता पछि ट्रम्प र किम नाम गोप्य राखिएको रेष्टुरेन्टमा आयोजित रात्रिभोजमा सहभागी हुने छन् । रात्रिभोजमा ट्रम्पसँग अमेरिकी विदेश मन्त्री माइक पोम्पियो, कार्यबाहक चिफ अफ स्टाफ माइक मुलभाने र उत्तर कोरियाली पक्षबाट किमसँगै सत्तारुढ वर्कस पाटीका उपाध्यक्ष किम योङ छोल र किमकै बहिनी यो जोङ हुने बताइएको छ ।

झण्डै १ घण्टा ३० मिनेटको रात्रीभोज पछि नेताहरु रेष्टुरेन्टबाट छुट्टिने कार्यक्रम रहेको सञ्चार माध्यमले जनाएका छन् । दुइ नेताबीच भोली आणविक निशस्त्रीकरण, कोरियाली युद्धको औपचारिक अन्त्य, नाकाबन्दी हटाउने लगायतमा छलफल र सहमतिमा हस्ताक्षर हुने अपेक्षा गरिएको छ । यसैबीच ट्रम्पले भियतनामका राष्ट्रपति गुयेन फुत्रोसँग भेटवार्ता गरेका छन् भने किम शनिवार सम्म हनोइमा रहने बताइएको छ ।