अखबार नेपाल ट्रेन्डिङ

एजेन्सी: अमेरिकाले भारत र पाकिस्तानलाई थप सैन्य गतिविधि नगर्न आग्रह गरेको छ । पुलवामा आक्रमणलाई लिएर दुइ मुलुकबीच सिमावर्ती इलाकामा तनाब चुलिदै गएको बेला विदेशमन्त्री माइक पोम्पियोले यस्तो आग्रह गरेका हुन् ।

पाकिस्तानले आफ्नो भुमिमा प्रवेश गरेर हवाई आक्रमण गर्ने भारतलाई जवाफ दिने अधिकार रहेको बताएपछि पोम्पियोले संयमित हुन अपिल गरेका छन् । भारत र पाकिस्तानका विदेशमन्त्रीलाई छुट्टाछुट्टै टेलिफोन सम्पर्क गरी पोम्पियोले कुनै पनि हालतमा तनाब नबढाउन आग्रह गरेको सञ्चार माध्यमले जनाएका छन ।

मंगलबार सबेरै भारतीय वायू सेनाले नियन्त्रण रेखा लाइन अफ कन्ट्रोल पारेर पाकिस्तान प्रशासित कश्मिरको १० किलोमिटर भित्र प्रवेश गरी हवाइ आक्रमण गरेको थियो । हवाई आक्रमणमा ठुलो संख्यामा जैस ए मोहम्मदका लडाकू र तालिम केन्द्र ध्वस्त पारिएको दाबी भारतको छ भने पाकिस्तानले भारतीय वायू सेनाले आफ्नो भुमिमा प्रवेश गरेर सम्प्रुभंता उल्लंघन गरेको र त्यसको जवाफ दिने चेतावनी दिएको छ ।

यसैबीच सिमावर्ती कश्मिरमा भारतीय र पाकिस्तानी सेनाबीचको दोहोरो गोली हानाहानमा ४ जनाको मृत्यु भएको छ भने अन्य ७ जना घाइते भएका छन् । गत फ्रेबुअरी १४ तारिख भारत प्रशासित कश्मिरको पुलवामा आतंकवादी आक्रमणमा ४२ सुरक्षाकर्मीको ज्यान गएपछि दक्षिण एशियाका आणविक शक्ती सम्पन्न मुलुकबीच वाकयुद्ध र सिमानामा एक अर्का विरुद्ध फायरिङ भइरहेका छन् ।

यसैबीच पाकिस्तानी वायु सेनाका ३ वटा लडाकू विमान भारतीय भुमिमा प्रवेश गरेको दाबी भारतले गरेको छ । भारत प्रशासित कश्मिर प्रवेश गरेका पाकिस्तानी विमानलाइ सेनाले लखेटेको दाबी पनि भारतको छ भने पाकिस्तानले सिमावर्ती इलाकामा वायूसेनाले जवाफी कारबाही गरेको दाबी गरेको छ ।