अखबार नेपाल ट्रेन्डिङ

कश्मिरको पलुवामा आक्रमणपछि चुलिएको भारत पाकिस्तान विवाद उत्कर्षमा पुगेको छ । भारतले विद्रोही समूह जैस-ए-मोहम्मदका लडाकू र प्रशिक्षण केन्द्रलाई लक्षित गरी पाकिस्तानी भूमिमा गरेको हवाई आक्रमण गरेको दावी गरेपछि दुई देशबीचको वाकयुद्ध झनै झाङ्गिएको हो ।

भारतले आक्रमणमा ३ सय भन्दा बढी लडाकू मारिएको दाबी गरेको छ । सिमावर्ती नियन्त्रण रेखा लाइन अफ कन्ट्रोल पार गरेर मंगलबार बिहान भारतीय वायू सेनाका लडाकू विमानले हवाई आक्रमण गरेको भारतीय सञ्चार माध्यमले जनाएका छन् ।

भारतीय विदेशमन्त्रालयले वायू सेनाका १२ लडाकू विमानले गरेको हवाई आक्रमणमा १७ भन्दा बढी लडाकूको प्रशिक्षण शिविर ध्वस्त भएको बताएको छ । मंगलबारै राजस्थानमा आयोजित र्यालीमा सम्बोधन गर्दै भारतीय प्रधानमन्त्री नरेन्द्र मोदीले आतंकवादीको शिविर ध्वस्त पारेको भन्दै वायू सेनालाई धन्यवाद दिएका छन् । उनले देशको शिर झुक्न नदिने प्रतिबद्धता ब्यक्त गरे ।

उता, पाकिस्तानी सेनाले सिमा उल्लंघन गरेर आफ्नो भूमिमा प्रवेश गरेको भारतीय सेनाको विमानलाई लखेटिएको दाबी गरेको छ । प्रधानमन्त्री इमरान खानले बोलाएको आपतकालीन सुरक्षा बैठकपछि जारी विज्ञप्तिमा पनि भारतले गरेको दावीलाई खारेज गरिएको छ । भारतले आफ्नो उद्देश्य पुर्तिका लागि बिना आधारको दावी गरेको भन्दै पाकिस्तानले भारतलाई उपयुक्त स्थानमा जवाफ दिइने पनि चेतावनी दिएको छ ।

आक्रमणको प्रचार आन्तरिक राजनीतिसँग सम्बन्धित रहेको पाकिस्तानको भनाई छ । यद्यपी प्रधानमन्त्री इमरान खानले सेना लगायत सबै सुरक्षा अंगहरुलाई सबै अवस्थाका लागि तयार रहन निर्देशन दिएका छन् ।

यसैबीच, यूरोपेली संघ (इयू) ले दुबै एशियाली मुलुकलाई ‘अत्यधिक संयमता अपनाउन’ आग्रह गरेको छ । “ईयू दुबै मुलुकसँग सम्पर्कमा रहेको वताउँदै दुबै मुलुकले ‘अत्यधिक संयमता अपनाउन’ र स्थितिलाई थप तनावतिर जान नदिन जरूरी रहेको प्रवक्ता माजा कोसिजान्सिकको भनाई छ ।