अखबार नेपाल ट्रेन्डिङ

एजेन्सी: बेलायतका प्रधानमन्त्री बोरिस जोनसनले फ्रान्सका राष्ट्रपति इमानुएल म्याक्रोनसँग ब्रेजिक्टका बारेमा छलफल गर्ने भएको छ । अर्को साता हुने जि सेभेनको शिखर सम्मेलनका क्रममा उनीहरुबीचमा छलफल हुने फ्रान्सका कूटनीतिक अधिकारीहरुले शनिबार जानकारी दिएका छन् ।

यही अगस्त २४ देखि २६ सम्म फ्रान्सकै दक्षिणी क्षेत्रमा रहेको एउटा रिसोर्टमा हुने सम्मेलनमा उहाँहरुबीच भेटवार्ता हुने सम्भावना रहेको हो । जर्मन चान्सलर एङ्गेला मर्केलका एकजना प्रवक्ताले पनि जोनसनसँग बर्लिनमा चाँडै भेट हुने अपेक्षा गरिएको बताएका थिए ।

चान्सलर र नयाँ प्रधानमन्त्री बोरिसबीच टेलिफोनमा यसअघि पनि एक पटक कुराकानी भएको तर ब्रेजिक्ट र युरोपेली मुलुकसम्बन्धी अन्य विषयमा भने अब कुरा हुने सम्भावना रहेको प्रवक्ताले भने । बेलायतले ब्रेजिक्टलाई पारित गर्न सक्छ कि सक्दैन भन्ने विषय अब युरोपेली सङ्घको भूमिकामा भर पर्ने जोनसोन सरकारले बताउँदै आएको छ । यसमा फ्रान्सको भूमिका महत्वपूर्ण हुने भएकाले बेलायती प्रधानमन्त्री जोनसोन र फ्रान्सेली राष्ट्रपति म्याक्रोनको भेटवार्तालाई चासोका साथ हेरिएको छ ।