अखबार नेपाल ट्रेन्डिङ

एजेन्सीः इरानमाथि सैन्य कारबाही गरेर फर्किएको संयुक्त राज्य अमेरिकाको एक ‘एफ-३५’ युद्धविमानले मध्यपूर्वको एक सैन्य अखडामा आकस्मिक अवतरण गरेको छ । अमेरिकी सैन्य अधिकारीका अनुसार इरानी आकाशमा युद्ध मिसन पूरा गरी फर्कने क्रममा उक्त विमानमा समस्या देखिएको हो ।

अमेरिकी केन्द्रीय कमाण्ड (सेन्ट्रकम) का प्रवक्ता क्याप्टेन टिम हकिन्सले बिहीबार विमानको सुरक्षित अवतरण भएको र पाइलटको अवस्था सामान्य रहेको जानकारी दिएका छन् । हकिन्सले एक विज्ञप्ति जारी गर्दै भनेका छन्, ‘इरानमाथि सैन्य अभियान चलाएर फर्किएको अमेरिकी एफ-३५ विमानले क्षेत्रीय सैन्य अखडामा आकस्मिक अवतरण गरेको प्रतिवेदनबारे हामी सचेत छौँ । विमान सुरक्षित अवतरण भएको छ र पाइलटको स्वास्थ्य अवस्था स्थिर छ । यस घटनाबारे विस्तृत अनुसन्धान भइरहेको छ ।’

सिएनएनले अज्ञात स्रोतहरूलाई उद्धृत गर्दै जनाए अनुसार, झण्डै १० करोड डलर मूल्य पर्ने उक्त अत्याधुनिक विमानलाई इरानले प्रहार गरेको हुन सक्ने सम्भावना छ । यता इरानको इस्लामिक रिभोलुसनरी गार्डले पनि एक विज्ञप्ति जारी गर्दै आफूहरूले अमेरिकी विमानलाई निशाना बनाएको दाबी गरेको छ । यद्यपि, विमान कुन कारणले आकस्मिक अवतरण गर्न बाध्य भयो भन्नेबारे अमेरिकाले औपचारिक पुष्टि गरिसकेको छैन

युद्धको पहिलो सातामै अमेरिकी सेनाको तीन वटा एफ-१५ लडाकु विमान कुवेतमा खसेको थियो । त्यतिबेला कुवेती हवाई प्रतिरक्षा प्रणालीले नै भूलवश अमेरिकी लडाकू विमान खसालेको भनिएको थियो । विमान खस्दै गर्दा चालक दलका सदस्यहरू प्यारासुटमा बाहिर निस्केका थिए । गत साता इराकको पश्चिमी क्षेत्रमा लडाकू विमानमा इन्धन भर्न परिचालिन केसी-१३५ दुर्घटनाग्रस्त भएको थियो । दुर्घटनाको कारण स्पष्ट नभएपनि अमेरिकी सेनाले यो घटना शत्रुको आक्रमण वा आफ्नै पक्षबाट भएको फायर कुनैपनि कारणले नभएको बताएको थियो ।

उक्त दुर्घटनामा विमानमा सवार सबै ६ जना चालक दल सदस्यको मृत्यु भएको थियो । युद्धको तेस्रो साता नजिकिँदै गर्दा आगामी अवस्थाबारे अझै अन्योल कायम छ । अमेरिकी सञ्चारमाध्यमका अनुसार ३१औँ मरीन एक्स्पिडिसनरी युनिट र ट्रिपोली एम्फिबियस रेडी समूहलाई क्षेत्रमा पठाइएको छ । यूएसएस ट्रिपोली हालै सिंगापुरतर्फ अघि बढिरहेको देखिएको थियो । यद्यपि अमेरिकी उच्च अधिकारीहरूले इरान विरुद्धको अभियान सफलतापूर्वक अघि बढिरहेको दाबी गर्दै आएका छन् ।