अखबार नेपाल ट्रेन्डिङ

एजेन्सी: साविकको उपविजेता बोरुसिया डर्टमन्डले जर्मन बुन्डेस लिगामा शानदार शुरुवात गरेको छ । घरेलु मैदानमा डर्टमन्डले पछि परेको स्थितिमा उत्कृष्ट पूनरागमन गर्दै अग्सवर्गमाथि ५–१ को शानदार जित निकालेको हो ।

सिग्नल इडुना पार्कमा डर्टमन्डलाई शानदार जित दिलाउन पाको अल्कासेरले दुई तथा जाडोन सान्चो, मार्का रिउस र जुलियन ब्रान्डले गोल गरे । अग्सवर्गका फ्लोरियनले गरेको गोल सान्त्वना बन्यो । खेल पहिलो मिनेटमा नै डर्टमन्ड फ्लोरियनको गोलबाट पछि परेको थियो । तर, डर्टमन्डले त्यसको दुई मिनेटपछि नै बराबरी गोल फर्काउन सफल भयो । तेस्रो मिनेटमा पाको अल्कासेरले बराबरी गोल गरे । पहिलो हाफ १–१ गोलको बराबरीमा सकिएपनि डर्टमन्डले दोस्रो हाफमा उच्च प्रदर्शन गर्दै ४ गोल थप्न सफल भयो । डर्टमन्डले दोस्रो हाफमा ९ मिनेटको अन्तरमा ३ गोल गर्न सफल भएको थियो ।