अखबार नेपाल ट्रेन्डिङ

एजेन्सी: युरोपेली मुलुक चेक रिपब्लिकमा प्रधानमन्त्री आन्ड्रेज बाबिसको राजीनामा माग गर्दै विशाल प्रदर्शन भएको छ । आपराधिक गतिविधिमा संलग्न भएको र राष्ट्रघात गरेको आरोप लगाउँदै प्रधानमन्त्री बाबिसको राजीनामा माग गर्दै मिलियन मोमेन्ट्स अफ डेमोक्रेसी ग्रुपले विशाल प्रदर्शन गरेको हो ।

प्रदर्शनकारीहरुले आपराधिक गतिविधिमा संलग्न र राष्ट्रघातको आरोप लागेका व्यक्ति पदमा बस्न नहुने भन्दै राजीनामा माग गरेका हुन् । चेक रिपब्लिकमा भएको प्रदर्शन सन् १९८९ पछिकै ठूलो भएको अन्तर्राष्ट्रिय सञ्चारमाध्यमले जनाएका छन् ।

प्रधानमन्त्री बाबिसमाथि युरोपियन युनियनले दिएको २ मिलियन युरो अनुदान हिनामिना गरेको आरोपमा अनुसन्धान भइरहेको छ । उनले आफू सत्तामा आउनु अघि सन् २०१७ मा सो रकम दुइवटा कोषमा ट्रान्सफर गरेको आरोप छ । प्रधानमन्त्रीले भने आफूमाथिको आरोप अस्वीकार गर्दै आएका छन् । प्रदर्शनकारीहरुले प्रधानमन्त्रीले राजीनामा नदिएसम्म प्रदर्शन थप चर्काउने चेतावनी दिँदै आएका छन् ।