अखबार नेपाल ट्रेन्डिङ

एजेन्सी: इरानको तेल निर्यात सम्बन्धी प्रतिबन्धमा थप कडाइ गर्ने अमेरिकाको निर्णयप्रति चीनले गम्भीर आपत्ति जनाएको छ । ट्रम्प प्रशासनले ईरानसँग तेलको कारोबार गर्ने राष्ट्रहरु पनि प्रतिबन्धको शिकार हुने चेतावनी दिएपछि बेइजिङले आक्रोश व्यक्त गरेको हो ।

भारतसँगै चीन पनि इरानको सबैभन्दा ठूलो तेल ग्राहक रहँदै आएको छ । अमेरिकाको सो फैसलाले विश्वव्यापी रुपमा तेल बजारलाई अनिश्चित तुल्याउने हुँदा यसबारे चिन्ता व्यक्त गरिएको छ । चीन एकतर्फी प्रतिबन्ध र अमेरिकाद्वारा सञ्चालित तथाकथित ‘न्यायालय’ को कडा विरोध गरेको चिनियाँ विदेश मन्त्रीले पत्रकार सम्मेलनमा जानकारी दिएका छन् ।

अघिल्लो वर्ष इरानसँग कारोबार गरिरहेका सात मुलुकहरुलाई अमेरिकाले यस विषयमा छुट दिएको थियो तर आगामी मे २ मा सो छुटको अवधि समाप्त हुनेछ । यस्तोमा अमेरिकाको सो निर्णयप्रति चीनले मात्र नभएर अन्य राष्ट्रहरुले समेत विरोध जनाइरहेका छन् । सोमबार मात्र अमेरिकी राज्य सचिव माइक पोम्पेओले मे महिनासम्मको समय अवधि सकिएपछि इरानबाट तेल खरिद गर्न जारी राख्ने राष्ट्रहरुले गम्भीर परिणाम भोग्नुपर्ने चेतावनी दिएका थिए ।

भारतले भने तत्काल यस विषयमा कुनै प्रतिक्रिया जनाएको छैन । भारत सरकारले यसअघि नै एकलौटी प्रतिबन्धलाई मान्यता नदिने र केवल संयुक्त राष्ट्रको निर्णय मात्र पालना गर्ने बताएको थियो । साउदी अरब र इराकपछि इरान सबैभन्दा ठूलो तेल निर्यातकर्ता हो ।