अखबार नेपाल ट्रेन्डिङ

काठमाडौं: शेर्पा संघ  किताकान्तो जापानले  यस वर्ष पनि ‘प्रवासमा भाषा, धर्म, कला र संस्कृतिको संरक्षण, शेर्पा संघ जापानको मूल अभियान’ भन्ने मुल नाराका साथ हिमाली बौद्ध धर्मावलम्बीहरूको महान राष्ट्रिय  चाड ग्याल्पो लोसार २१५३ औं  मे फो ता लो लोसारको पावन अवसरमा शुभकामना आदान-प्रदान तथा बृहत् सांस्कृतिक कार्यक्रम आयोजना गर्ने भएको छ ।

शेर्पा संघ जापान क्षेत्रीय कमिटी किताकान्तोले मार्च ८ तारिख आइतबारका दिन गुन्मास्थित सासा छे एण्ड सेन्ट्रल बार, रेष्टुरेन्टमा जापानको स्थानीय अनुसार दिउँसो १२ बजेदेखि बेलुकी ८ बजेसम्म सञ्चालन हुने जानकारी गराईएको छ । कार्यक्रममा  शेर्पा समुदायका चर्चित राष्ट्रिय गायक सोनाम शेर्पा कोशिस, चर्चित डिजे छेवाङ शेर्पाको साथमा स्थानीय शेर्पा कलाकारहरु सोनाम कहानी, कर्मा दोङ तामाङ दावा के शेर्पाको विशेष सांगीतिक प्रस्तुति रहनेछ । कार्यक्रममा स्थानीय कलाकारहरूले पनि विभिन्न सांस्कृतिक प्रस्तुतिहरू रहने शेर्पा संघ जापानका अध्यक्ष दावा के शेर्पाले जानकारी दिएका छन् ।

संघका महासचिव रिन्जीङ लामा शेर्पाका अनुसार कार्यक्रममा टिकट लिन नपाएका इच्छुक सहभागीहरूले कार्यक्रम स्थलमै प्रवेशद्वार (गेट) मा टिकट खरिद गर्न सक्ने सुविधा समेत मिलाइएको छ । संघले जापानमा रहेका सम्पूर्ण नेपाली समुदायलाई यस सांस्कृतिक उत्सवमा उपस्थित भई कार्यक्रमको शोभा बढाइदिन समेत निमन्त्रणा गरेको छ ।