अखबार नेपाल ट्रेन्डिङ

काठमाडौं: आदिवासी जनजाति चलचित्र महासंघले यहि जेठ २३, २४ र २५ गते तीन दिने चौथो आदिवासी चलचित्र महोत्सव २०८१ गर्ने भएको छ ।

महासंघले आफ्नो स्थापनाकालदेखि नै आदिवासी जनजाति चलचित्रहरुको प्रवर्द्धन तथा संम्बर्द्धन गर्नका लागि हरेक वर्ष विभिन्न कार्यक्रमहरु गर्दै आईरहेको छ । २०७६ सालदेखि प्राकृतिक महामारीको कारण आयोजना गर्न नसकिएको महोत्सव यस वर्षदेखि पुनः सुचारु गर्न लागिएको महासंघले पत्रकार सम्मेलन मार्फत जानकारी गराएको छ ।

नेपाल एक बहुभाषी, बहुजाती, बहुधार्मिक, बहुसाँस्कृतिक राज्य भएका कारण मुलुकको अर्थतन्त्रलाई बलियो बनाउदैं राष्ट्रको पहिचानलाई जोगाई राख्ने अठोटका साथ आदिबासी जनजाति चलचित्रकर्मीहरु आदिबासी चलचित्र निर्माण गरिरहेका छन् । समृद्व नेपाल निर्माणको लागि चलचित्रको धेरै महत्व हुँदा हुँदै पनि सम्बन्धित निकायबाट चासोका साथ यसलाई महत्व दिइएको पाईदैन ।

२०४४ सालमा नेवारी भाषाको चलचित्र शिलु निर्माण भएदेखि झण्डै ७०० सय भन्दा बढी कथानक आदिबासी चलचित्र निर्माण भईसकेका छन् । तर नीतिगत समस्याका कारण सोचे अनुरुप आदिवासी जनजाति चलचित्रहरुको विकास हुन सकेको छैन । यदि राज्य र सम्बन्धित निकायले चासोका साथ यसलाई प्राथमिकता दिई अवसर प्रदान गर्ने हो भने आदिवासी चलचित्रले राष्ट्रको मौलिक पहिचान बचाई राख्नुको साथै नेपालको साँस्कृतिक र प्राकृतिक क्षेत्रको पर्यटन विकास गर्दै मुलुकको अर्थतन्त्रमा ठुलो टेवा पुर्याउने बिश्वासका साथ महासंघले तीन दिने चौथो आदिबासी चललिचत्र मोहत्सब २०८१ कार्यक्रमको आयोजना गर्न लागेको पत्रकार सम्मेलन गरी जानकारी दिएको छ ।

चलचित्रको माध्यमबाट आदिवासी जनजातिहरुको मौलिक कला-संस्कृति, भाषा, धर्म, परम्परा, प्रथाहरुको दस्तावेजीकरण, संरक्षण, प्रवर्द्धनका साथै पर्यटन विकासका लागि राष्ट्रिय तथा अन्तर्राष्ट्रिय स्तरमा ‘चौथो आदिबासी चललिचत्र मोहत्सव २०८१’ ले सहयोग गर्ने लक्ष्य लिएको छ । साथै यस महोत्सवमा जातिय संस्थाबाट छनौट भई आएका आदिवासी जानजाति मातृभाषी चलचित्र, वृत्तचित्र र छोटा चलचित्र प्रदर्शन गरिने छ । यस महोत्सवमा सहभागिता जनाउने चलचित्रहरुलाई बिभिन्न ८ वटा विधामा अवार्ड प्रदान गरिने पनि पत्रकार सम्मेलन मार्फत जानकारी गराएको छ । उत्कृष्ट चलचित्रलाई नगद रु. २० हजार उत्कृष्ट वृतचित्र १० हजार र उत्कृष्ट सर्टफिल्म १० हजार सहित प्रमाण-पत्र प्रदान गरिनेछ भने पब्लिक च्वाईस अवार्ड पाउँनेलाई रु. ३५ हजार रुपैया नगद पुरस्कार प्रदान गरिने बताईएको छ ।

तीन दिने चलचित्र महोत्सवमा आदिवासी मौलिक खानाको स्टल, मौलिक आदिवासी भेषभुषा, आदिवासी फोटो प्रदर्शन, मौलिक आदिवासी र्याम्प वक, मौलिक विभिन्न जातिको झाँकीको साथमा सास्कतिक कार्यक्रम समेत हुनेछ । नर्भिक अन्तराष्ट्रिय अस्पताल संगको सहकार्यमा जेनरल स्वास्थ्य शिविर, रक्तदान, कार्यक्रम समेत सञ्चालन गरिने बताईएको छ ।

चौथो आदिवासी चलचित्र महोत्सवमा चलचित्र बिकास बोर्ड, आदिवासी जनजाति उत्थान राष्ट्रिय प्रतिष्ठान, नेपाल पर्यटन बोर्ड, राष्ट्रिय वाणिज्य वैंक, नेपाल टेलिकम, नर्भिक अन्तराष्ट्रिय अस्पताल, माडवाडी सेवा समितिको सहकार्य रहनेछ ।