अखबार नेपाल ट्रेन्डिङ

काठमाडौं: दक्षिण भारतीय हिन्दी फिल्म ‘आदिपुरुष’को विवादित संवाद नसच्चाइएको भन्दै आजदेखि काठमाडौं र पोखरा महानगरमा हिन्दी फिल्म प्रदर्शनमा रोक लगाइने भएको छ ।

काठमाडौं महानगरपालिकाले नगरभित्रका हलहरूमा हिन्दी फिल्मको प्रदर्शन रोक्ने तयारी गरेको छ । दक्षिण भारतीय फिल्म ‘आदिपुरुष’ भएको ‘सीता भारतको छोरी हुन्’ संवाद भारतमा नहटाएपछि महानगरले काठमाडौंमा चल्न नदिने बताएको छ । महानगरपालिकाले बिहानैदेखि हलहरूमा नगर प्रहरी खटाउने भएको छ ।

‘काठमाडौं महानगरपालिका क्षेत्रभित्र उक्त राष्ट्रहित विपरितको चलचित्रको प्रदर्शनलाई निषेध गरेर मात्र देशभित्रका अन्य क्षेत्र र विदेशमा सो चलचित्र प्रदर्शन हुन दिने हो भने त्यसले भ्रामक तथ्य स्थापित गर्ने भएकोले उक्त चलचित्रबाट आपत्तिजनक अंश नहटाएसम्म काठमाडौ महानगरमा कुनैपनि हिन्दी फिल्महरु प्रदर्शन गर्नमा निषेध गरिएको महानगर प्रमुख बालेन्द्र शाहले बताएका छन् ।

यसैगरी पोखरा महानगरपालिकाले पनि हिन्दी फिल्म प्रदर्शनमा रोक लगाउने निर्णय गरेको छ । ‘आदिपुरुष’मा भएको त्रुटिपूर्ण संवाद नसच्चाएसम्म हिन्दी फिल्म प्रदर्शनमा रोक लगाउने निर्णय गरेको महानगरपालिकाले जनाएको छ ।

महानगर प्रमुख धनराज आचार्यले पोखराका हलहरू श्रीकृष्ण, विन्ध्यावासिनी हल, सिनेप्लेक्स र मिडटाउन हिन्दी फिल्म प्रशारणमा रोक लगाउन पत्र लेखेका हुन् । पत्रमा ‘जानकी भारतीय छोरी हुन्’ भन्ने शब्द नसच्चिएसम्म नगर क्षेत्रभित्रका हलमा अन्य भारतीय प्रदर्शन पनि रोक्न निर्देशन दिइएको छ ।