अखबार नेपाल ट्रेन्डिङ

निखुर
कालो घोडाको टाप बच्छ
ट्वाक – -ट्वाक – – ट्वाक
मर्त्यलोकबाट
मूर्दा मानवहरु कराइरहेछन्
उठाउ – – उठाउ – –
यो अधकल्चो देश
तमासा हेर्दै
ताली बजाइरहेछन्
राष्ट्र लुट्न पल्केका
गद्दार सत्ताधारीहरु

हिमपहिरो गएर देश
खैराते डाँडाजस्तै देखिन्छ
डडेलो लागेर देश
उजाठ, उराठ देखिन्छ
अन्यन्त्रित कानुन, व्यवस्था
स्लो पोइजन बनेर
प्यारलाईसिस बनाइरहेछ
गिद्दीहरुलाई
मगज खलबलिएर
जालो बुन्न छोडेको माकुरोजस्तै
ट्वाँ परेर हेरिरहेछन
वफादारिता पाएका
गद्दार सत्ताधारीहरु

दुर्योधन उत्साहित छ
सकुनी पासा खेल्ने खाल
निर्माण गर्नमा व्यस्त छ
रावण अपहरणमा तल्लिन छ
कंस नावालक हत्यामा
निपूण बन्दैछ
यो मानव वस्तिभित्र
मानविय दानवहरु चिच्याइरहेछन्
यसरी नै बढ्दै गएर
एकदिन यी जनताहरु भुटिदिनेछौँ
एकदिन यो देश बेचिदिनेछौँ
गद्दी उल्टिने त्रासले
कानमा बुचो हालेर
नसुनेको अभिनय गर्दै
चुपचाप-चुपचाप बसिरहेछन्
गद्दार सत्ताधारीहरु

देश डुब्नलाई
सुनामी किन चाहियो र ?
देश निल्नलाई
ब्ल्याक होल किन चाहियो र ?
देश तहस-नहस पार्नलाई
घन, झ्याम्पाल, हम्मर, गैंती
क्षेप्यास्त्र किन चाहियो र ?

र पनि – – –
बाघको छाला ओढेर
बाघ बन्न खोज्छन्
हात्तीको देखाउने दाँतजस्तै
देखिन्छन् ठाउँ-ठाउँमा
दिन हिच्किचाउदैनन् दर्शन
गर्न छोड्दैनन्
शान्ति/राष्ट्रियताको कुरा
सुन्दर परिवर्तन/परिकल्पनाको कुरा
सुन्दर संरचना/परिचालनको कुरा
लाज पचेका गद्दार सत्ताधारीहरु ।