अखबार नेपाल ट्रेन्डिङ

काठमाडौं: ग्यास उद्योगीले पिडिओ लिन वन्दगरेपछि बजारमा खाना पकाउने ग्यास अभाव देखिएको छ । नेपाल आयल निगम र उद्योगीले बजारमा ग्यासको अभाव हुन नदिने बताएपनि उपभोक्ताले भने ग्यास नपाएको भन्दै आक्रोश व्यक्त गरेका छन् ।

कमिसन र मूल्य समायोजनको मागसहित शुक्रवारदेखि ग्यासको पिडिओ लिन बन्द गरेपनि बजारमा ग्यासको अभाव सृजना हुन नदिने निगमले दावी गरेको थियो । तर, बजारमा ग्यासको मूल्य तत्काल वृद्धि नहुने र कृतिम अभाव सृजना गर्नेलाई कडा कारवाही गर्ने चेतावनी पनि निगमले दिएको थियो ।

निगमको चेतावनीका बाबजूद पनि उद्योगीले पिडियो लिन बन्द गरेकै अर्को दिनदेखि बजारमा ग्यास अभाव देखिन थाल्नुले निगमको कार्यशैलीप्रति प्रश्न उब्जिएको छ । त्यस्तै, उद्योगीले पनि आफ्नो माग सरकार र निगमसँग भएकाले बजारमा ततकाल अभाव सृजना नगर्ने बताउदै आएपनि भोलिपल्टै ग्यास अभाव देखिनुले उद्योगी पनि उपभोक्ताप्रति उत्तरदायी बन्न नखोजेको प्रस्ट भएको छ ।

बजारमा ग्याको कृतिम अभाव भइरहँदा उपभोक्ताको चुलोसम्म जोडिने विषयमा उद्योगी, निगम र सरकार संवेदनशील नभएको प्रष्ट देख्न सकिन्छ । ग्यास नपाएको भन्दै उपभोक्ता आक्रोशित भएपछि हामीले विक्रेतालाई ग्यास किन विक्री नगरेको भनी प्रश्न गर्दा डिपोले नै ग्यास नपाठाएको विक्रेताको जवाफ थियो ।

सरकार, निगम र उद्योगीले तत्काल समस्या समाधान गरी आपूर्ती व्यवस्था सहज पार्नुपर्ने देखिन्छ । निगम र उद्योगी दुवै उपभोक्ताको दैनिकी सहजताका लागि स्थापना भएका संस्था हुन् । यसरी आम नागरिकको दैनिकीसँग जोडिएका दुबै संस्था उत्तरदायी र जवाफदेही बन्न नसक्दा उनीहरुको भूमिकाप्रति प्रश्न उब्जिएको छ ।।