अखबार नेपाल ट्रेन्डिङ

भक्तपुरः ६६औं राष्ट्रिय सहकारी दिवस देशभर विभिन्न कार्यक्रमका साथ मनाइँदैछ । यसै क्रममा भक्तपुरको सूर्यविनायक-४, दधिकोटमा रहेको घरपरिवार बचत तथा ऋण सहकारी संस्था लिमिटेडले आफ्नै कार्यालय प्राङ्गणमा अन्तर्क्रियात्मक कार्यक्रमका साथ ६६औं राष्ट्रिय सहकारी दिवस भव्यताका साथ मनाएको छ ।

कार्यक्रममा घरपरिवार बचत तथा ऋण सहकारी संस्था लिमिटेडका अध्यक्ष श्रीकृष्ण विष्ट, सचिव यादव सिलवाल, ऋण लगानी उपसमितिका संयोजक लेखबहादुर विष्ट, सञ्चालक बलराम सिलवाल, महिला समितिकी संयोजक रमिला थापा, लेखा समितिका संयोजक रुपहरि अधिकारी, व्यवस्थापक उद्धव सिलवाल खत्री, लेखा अधिकृत शंकरबहादुर बुढाथोकीलगायतका वक्ताहरुले सहकारीका विविध पक्षमाथि प्रकाश पारेका थिए ।

सो अवसरमा घरपरिवार बचत तथा ऋण सहकारी संस्था लिमिटेडले प्रकाशन गरेको नयाँ वर्ष २०८० को भित्ते पात्रो (क्यालेण्डर) सल्लाहकार वरिष्ठ पत्रकार ताराचन्द्र देवकोटा, घनश्याम भूषाल, अध्यक्ष श्रीकृष्ण विष्ट, सचिव यादव सिलवाललगायत सञ्चालकहरुले संयुक्त रुपमा विमोचन गरेका थिए । ६६औं राष्ट्रिय सहकारी दिवसको अवसरमा उक्त सहकारीले गुणस्तरीय सेवासहित सदस्यता बृद्धि कार्यक्रमलाई जोड दिएको छ ।

स्मरणीय छ, मुलुकमा देखा परेको आर्थिक संकटको अवस्थामा पनि सदस्यहरुलाई गुणस्तरीय सेवा सहज रुपमा प्रदान गरेकै कारण घरपरिवार बचत तथा ऋण सहकारी संस्था लिमिटेड सदस्यहरु माझ विश्वसनीय रहेको स्थानीहरु बताउँछन् ।