अखबार नेपाल ट्रेन्डिङ

काठमाडौं: नेपाल बैंक र त्रिभुवन विश्वविद्यालय व्यवस्थापन केन्द्रीय विभागबीच अनुसन्धान सम्बन्धि कार्यमा सहकार्य गर्ने सम्झौता भएको छ ।

सम्झौता अनुसार विभागमा अध्ययनरत विद्यार्थीले बैंकमा इन्टर्नसीप गर्न पाउनेछन् भने विभागका विद्यार्थी र प्राध्यापकहरुमार्फत बैंकको आर्थिक तथा बैंकिङ क्षेत्रमा अनुसन्धानात्मक कार्य संचालन गर्ने छन् ।

बैंकको अनुसन्धान सम्वन्धि कार्यको लागि विभागले विषय विज्ञको रुपमा प्राध्यापकहरुको सूची बैंकलाई दिने विज्ञप्तिमा उल्लेख छ ।

बैंकका अनुसार सो सूची अन्तर्गत प्राध्यापकहरुलाई आवश्यकता अनुसार बैंकले अनुसन्धानको लागि विषय विज्ञका रुपमा नियुक्त गर्नेछ ।

बैंकले गरेका अनुसन्धान सम्वन्धि कार्यमा  व्यवस्थापन विभागमा संचालित शैक्षिक कार्यक्रमहरु एमबिए र एमबिएसमा अध्ययनरत विद्यार्थीहरुलाई ग्राजुएसन रिसर्च प्रोजेक्ट अन्तर्गत शोधपत्र लेखनका लागि छात्रवृत्ति स्वरुप न्यूनतम पाँच जना विद्यार्थीलाई जनही ३० हजार दिने विज्ञप्तिमा छ ।

बैंकले एमबिए इन कर्पोरेट लिडरसीप अध्ययन गरेका एक जना छात्र र एक जना छात्रालाई नगद र मेडलसहित नेपाल बैंक कर्पोरेट लिडरसीप अवार्ड दिने जनाएको छ ।

सम्झौतापत्रमा विभागका निमित्त विभागीय प्रमुख सह प्राध्यापक नवराज अधिकारी र बैंकका सहायक प्रमुख कार्यकारी अधिकृत होमबहादुर खड्काले हस्ताक्षर गरेका छन् ।

कार्यक्रममा बैंकका सिइओ कृष्णबहादुर अधिकारीले विश्व विद्यालयसँगको सहकार्यले बैंकको अनुसन्धानमा ठूलो सहयोग पुग्ने बताए ।

कार्यक्रममा विभागका एमबिए कार्यक्रम निर्देशक ज्ञानमणी अधिकारी, सह प्राध्यापक डा. धुब्रलाल पाण्डेय, डा. बलराम दुवास र डा. भरतसिंह थापाको उपस्थिती रहेको थियो ।

बैंकका तर्फबाट नायब प्रमुख कार्यकारी अधिकृत समता पन्त, सहायक प्रमुख कार्यकारी अधिकृत विश्वराज बराल, बजारीकरण तथा अनुसन्धान डिभिजन प्रमुख अर्जुनकुमार कँडेल र कम्पनी सचिव केशव भण्डारीको उपस्थिती थियो ।