अखबार नेपाल ट्रेन्डिङ

काठमाडौं: लामो समयदेखि रोकिएको कोरोना बीमाको रकम भुक्तानी हुने भएको बीमा समितिले जनाएको छ ।

कोरोना बीमा बापतको बाँकी रकम अर्थ मन्त्रालयले निकासा गर्न लागेपछि कोरोना बीमाको बाँकी रकम भुक्तानी हुन लागेको हो ।

यस अघि ४ अर्ब ७८ करोड ८१ लाख रुपैयाँ दाबी भुक्तानी गर्ने दायित्व निजी बिमा कम्पनी र समितिको भएकाले उक्त रकम  भुक्तानी भइसकेको छ ।

त्योभन्दा माथिको दाबीको भुक्तानी सरकारले गर्ने सहमति भएको भएपनि सरकारको तर्फबाट रकम निकासा गर्न नसक्दा कोरोनाका बीमितले दाबी पाउन सकेका छैनन् ।

कोरोना बीमा विषम परिस्थितिमा लागू भएको हुनाले अब यसको दायित्व पुन बीमा समिति, बीमा  कम्पनी र पुनर्बीमा कम्पनीले नै दायित्व बहन गर्न पर्ने अबस्था आएको स्रोतले बतायो ।

बीमा समितिको तथ्याङ्क अनुसार हालसम्म कोरोना बीमामा  १४ अर्ब ९३ करोड ९६ लाख ६६ हजार रुपैयाँको दाबी परेको छ ।

हालसम्म कोरोना बीमा पुलमार्फत ३ अर्ब ५० करोड रुपैयाँ र बीमा कम्पनीहरूबाट १ अर्ब २८ करोड ८१ लाख ७१ हजार रुपैयाँ गरी ४ अर्ब ७८ करोड ८१ लाख रुपैयाँ दाबी भुक्तानी भइसकेको छ ।

कोरोना बीमा कार्यविधि अनुसार सरकारले अनुदानका रुपमा कोरोना बीमा दावीको बहन गर्ने भनेको ११ अर्ब ४३ करोड रुपैयाँ भुक्तानी गर्न बाँकी छ ।