अखबार नेपाल ट्रेन्डिङ

काठमाडौं: सहिद स्मारक ‘ए’ डिभिजन लिग फुटबलमा ब्रिगेड ब्वाइज र न्युरोड टिम एनआरटीले बराबरी खेल्दै अंक बाँडेका छन् ।

त्रिपुरेश्वरस्थित दशरथ रंगशालामा भएको खेल दुबै टोलीले पाएको अवसरलाई सदुपयोग गर्न नसक्दा खेल बराबरीमा सकिएको हो ।

खेलको ४३ औं मिनेटमा एनआरटीले गोलको अवसर गुमायो । स्टेफेन बिनोङको क्रसमा रन्जन विष्ट ट्याप इनमा गोल गर्न असफल रहे ।

ब्रिगेडका दिनेश राईले ५०औं मिनेटमा पेनाल्टी क्षेत्रबाट प्रहार गरेको सशक्त प्रहार क्रसबार भन्दा केहि माथिबाट बाहिरिएको थियो ।

खेलको ६५ औं मिनेटमा ब्रिगेडका मिडफिल्डर दिनेश राईले सिक्स यार्ड बक्सको एजबाट प्रहार गरेको बल एनआरटीका गोलकिपर अजित प्रजापतिले पन्च गर्दै बचाएका थिए ।

ब्रिगेडका कप्तान रोशन राना मगरले ७३ औं मिनेटमा पेनाल्टी एरियाको ठिक बाहिरबाट प्रहार गरेको बलले पोस्टको दिशा लिन सकेन ।

खेलको अतिरिक्त समयमा ब्रिगेडका रुडी जुनियरले पेनाल्टी एरियाबाट प्रहार गरेको बल एनआरटीका गोलकिपर अजितले उत्कृष्ट बचाउ गरे ।

बराबरीसँगै ब्रिगेडले २ खेलमा ४ अंक जोडेको छ । पहिलो खेलमा ब्रिगेडले विभागीय टिम एपीएफलाई ३-२ गोल अन्तरले पराजित गरेको थियो ।

एनआरटीको यो पहिलो १ अंक हो । पहिलो खेलमा एनआरटी साविक विजेता मछिन्द्र एफसीसँग २-१ गोल अन्तरले पराजित भएको थियो ।

खेलमा ब्रिगेडका शिशिर लेखी म्यान अफ दि म्याच चुनिए ।