अखबार नेपाल ट्रेन्डिङ

काठमाडौं:  नेपाल बैंक लिमिटेडको शुक्लाफाँटा नगरपालिका– १० झलारी बजारस्थित शाखा कार्यालयले विद्यालय र सङ्घसंस्थाका कर्मचारीलाई बिनाधितो कर्जा प्रवाह कार्यक्रम सञ्चालन गरेको छ ।

बैंकले विद्यालय र सङ्घसंस्थाका कर्मचारीलाई बिनाधितो पाँच लाखदेखि १५ लाखसम्म कर्जा प्रवाह गर्ने भएको छ । कार्यक्रमअनुसार कर्जा प्रवाह गर्दा मासिक वा त्रैमासिकरुपमा रकम भुक्तानी गर्ने व्यवस्था मिलाएको बैंकले जनाएको छ ।बैंकले स्थायी कर्मचारीको चार वर्षको तलब स्केलअनुसार न्यूनतम ब्याजदरमा कर्जा लगानी गर्नेछ । कर्जा माग्ने कर्मचारी तीन वर्षको स्थायी हुनुपर्ने र सेवानिवृत्त हुन पाँच वर्षको अवधि बाँकी भएमा कर्जा प्रवाह गरिने बैंकले जनाएको छ ।

बैंकले बिनाधितो कर्जाका लागि शुक्लाफाँटा नगरपालिका– ७ स्थित धर्मजनता माध्यमिक विद्यालयसँग सम्झौतागरेको छ । विद्यालयमा कार्यरत शिक्षक कर्मचारीलाई कर्जा प्रवाहका लागि बैंकले सम्झौता गरेको हो ।  बैंकले हाल सुन कर्जा, पेन्सन बुझ्ने खाता, राजस्व बुझाउने सुविधा, सञ्चय कोष, नागरिक लगानी कोषमा रकम जम्मा गर्न सकिने सुविधा, डिमेट सुविधा, निःशुल्क मोबाइल बैंकिङ सुविधा, निःशुल्क एटिएम कार्डलगायतका सेवा ग्राहकलाई दिँदै आएको छ ।