अखबार नेपाल ट्रेन्डिङ

काठमाडौं: नेपाल राष्ट्र बैंकका गभर्नर महाप्रसाद अधिकारीले प्रणालीमा अधिक तरलता हुनु सहजताको संकेत रहेको उल्लेख गर्दै यसलाई अवसरमा रुपान्तरण गर्न बैंकका सीइओहरुलाई निर्देशन दिनु भएको छ ।

राष्ट्रबैंकले जारी गर्न लागेको एकीकृत निर्देशनअघि वाणिज्य बैंक, विकास बैंक र बित्त कम्पनीका सीइओहरुसँग भर्चुअल छलफल गरेका गभर्नर अधिकारीले अधिक तरलता सहजताको सूचक रहेको उल्लेख गर्दै नआत्तिन आग्रह गरेका हुन् ।

गभर्नर अधिकारीले कोभिडको बेला यदि तरलता नभएको भए डामाडोल अवस्था आउथ्यो र दक्षिण एशियामै हाम्रो फाइनान्सियल इण्डीकेटरहरु राम्रा छन् । हाम्रो उद्योगको निक्षेप नै जीडीपी बराबर छ र यसलाई सकारात्मक रुपमा लिनुपर्ने बताउनु भयो ।

उनले अहिले बैंकहरुसँग अधिक तरलता रहेको र भोलिका दिनमा राम्रोसँग लगानी बढाउन सकिने अवसर रहेको उल्लेख गर्दै पहाडी जिल्लाहरुमा विकास निर्माणका काम भइरहेका र त्यस्ता क्षेत्रहरुमा कर्जा प्रवाहका लागि बैंकहरुले गम्भीर भएर लाग्नुपर्नेमा जोड दिनुभयो ।

अधिक तरलता भई ब्याजदर तल झरेको अवस्थामा बैंकहरुले आफू नजिकका र चिनेजानेका ठूलाहरुको मात्र हित हुने गरी काम गर्न नहुने र अहिलेको बेलामा साना ऋणिहरुले पनि फाइदा लिनसक्ने अवस्था बन्नुपर्ने गभर्नर अधिकारीले बताउनु भयो ।

गभर्नर अधिकारीले अनावश्यक ठाउँमा कर्जा नजाओस् भन्ने आग्रह गर्दै यस्तो बेलामा कर्जाको दुरुपयोग धेरै हुनसक्ने र यसलाई रोक्ने काम गर्न आग्रह गर्नु भयो ।