अखबार नेपाल ट्रेन्डिङ

काठमाडौं: साल्ट ट्रेडिङ विराटनगरले केही हदसम्म युरिया मलको अभावलाई टार्ने भएको छ । आइतबार- सोमबारदेखि पूर्व क्षेत्रका १६ जिल्लामा २ सय ६० कृषि सहकारीमार्फत युरिया मल वितरण गर्ने तयारीमा साल्ट ट्रेडिङ जुटेको छ ।

साल्ट ट्रेडिङ कार्यालयमा आज ३० मेट्रिक टन युरिया प्राप्त हुने र दुई दिनभित्र ५ हजार ६ सय मेट्रिक टन युरिया मल कार्यालय आइपुग्ने प्रमुख राधेश्याम चौधरीले जानकारी दिए । उच्च गुणस्तरको उक्त युरिया मल प्रतिबोरा मूल्य रु ७ सय कायम भएको छ भने सहकारीले प्रति बोरामा १२ रुपैयाँ ५० पैसा छुट पाउने व्यवस्था गरिएको छ ।

विगतदेखि नुन, चिनी र रासायनिक मल किसानलाई उपलब्ध गराउँदै आएको यो कार्यालयले केही दिन पहिले ६ हजार मेट्रिक टन युरिया मल किसानलाई उपलब्ध गराइसकेको कार्यालय प्रमुख चौधरीले जानकारी दिए ।

साल्ट ट्रेडिङले आफ्ना मातहतका झापाको विर्तामोड, सिरहाको लहान र सप्तरीको राजविराज तथा आफनै कार्यालयबाट मोरङ, सुनसरी, धनकुटा, भोजपुर, सङ्खुवासभा र तेह्रथुम जिल्लाका किसानलाई मल उपलब्ध गराउँदै आएको छ ।