संघीय संसदका दुवै सदनको बैठक आज बस्दै
वि.सं.२०७६ माघ १४ मंगलवार ११:०१
1.3K
shares
काठमाडौं: प्रतिनिधिसभा र राष्ट्रिय सभा दुवै सदनको बैठक आज बस्दैछ । दिउँसो १ बजे बस्ने बैठकको सुरुमा नवनिर्वचति सभामुख अग्निप्रसाद सापकोटालाई दलीय आधारमा सांसदहरुले बधाई तथा शुभकामना दिने कार्यसूची छ । सभामुख सापकोटाले संचालन गर्ने पहिलो बैठकमा संवैधानिक आयोगका केही प्रतिवेदनहरु पेश गर्ने संभावित कार्यसूची निर्धारण गरिएको संसद सचिवालयले जनाएको छ ।
प्रधानमन्त्री केपी शर्मा ओलीका तर्फबाट न्याय परिषद् र न्याय सेवा आयोग, लोक सेवा आयोग, राष्ट्रिय प्राकृतिक स्रोत तथा वित्त आयोग, राष्ट्रिय समावेशी आयोग, मधेशी आयोग, थारु आयोग र मुस्लिम आयोगको बार्षिक प्रतिवेदन बैठकमा पेश हुनेछ । कानुन निर्माणका लागि महत्वपूर्ण मानिने संसदको हिउँदे अधिवशेन पुस ४ गतेदेखि सुरु भएपनि सभामुख चयनमा सहमति नजुट्दा एक महिनाभन्दा लामो समयसम्म बैठक बस्न सकेको थिएन । अब दर्ता भएर बसेका विधेयकहरु निरन्तर अघि बढ्ने संसद सचिवालयले जनाएको छ ।
यसैबीच, राष्ट्रिय सभाको बैठक पनि आज बस्दैछ । दिउँसो १ बजे बस्ने बैठकमा अख्तियार दुरुपयोग अनुसन्धान आयोग (तेस्रो संसोधन) विधेयक र भ्रष्टाचार निवारण (पहिलो संसोधन) विधेयक पेश हुनेछन् । शिक्षा, विज्ञान तथा प्रविधि मन्त्री गिरिराजमणी पोखरेलले योगमाया आयुर्वेदख विश्वविद्यालय विधेयक २०७६ लाई सभा समक्ष पेश गर्ने संसद सचिवालयले जनाएको छ । बैठकमा सभा अध्यक्षले प्रतिनिधिसभाका पूर्वसदस्य गम्भीरजंग कार्कीको निधनमा शोक प्रस्ताव प्रस्तुत गर्ने कार्यसूची पनि रहेको छ ।
वि.सं.२०७६ माघ १४ मंगलवार ११:०१



















