अखबार नेपाल ट्रेन्डिङ

काठमाडौं: सहिद स्मारक ए डिभिजन लिगमा आज दशरथ रंगशालामा हुने पहिलो खेलमा मछिन्द्र क्लब र फ्रेन्ड्स तथा दोस्रो खेलमा च्यासल युथले न्युरोड टिम एनआरटीसँग प्रतिस्पर्धा गर्नेछ । मछिन्द्रलाई लिगमा अंक विहिन रहेको फ्रेन्ड्सलाई हराउँदै ३ अंक जोड्ने अवसर छ ।

पहिलो खेलमा ब्रिगेड ब्वाईजलाई हराएको मछिन्द्रले दोस्रो खेलमा च्यासलसँग १–१ गोलको बराबरी खेल्दै अंक बाँडेको थियो । राष्टिय फुटबल टिमका अधिकांश अनुहार अनुबन्धन गरेको मछिन्द्र लिगको प्रमुख दाबेदार टिम हो । नयाँ सिजन तीन ब्राजिलियन खेलाडी राखेर पनि फ्रेन्ड्सले अपेक्षित प्रर्दशन गर्न सकेको छैन । युवा खेलाडीले समेत प्रभाव जमाउन नसक्दा फ्रेन्ड्स लिगमा अंक विहिन छ ।

यस्तै, दोस्रो खेलमा च्यासल र एनआरटी आमने सामने हुँदैछन् । च्यासल लिगको अर्को दाबेदार टिमको रुपमा देखिएको छ । पहिलो खेलमा संकटालाई २-० ले हराएको उसले दोस्रो खेलमा मछिन्द्रसँग अंक बाँडेको थियो । भेट्रान फरवार्ड सन्तोष शाहुखल नेतृत्वमा रहेको च्यासलले राष्ट्रिय टिमका केही अनुहार समावेश गर्दै सन्तुलित टिम बनाएको छ । तीन जापानी खेलाडीको प्रभावमा च्यासलले नयाँ सिजनको लिगमा राम्रो नतिजा निकाल्ने देखाएको छ ।