अखबार नेपाल ट्रेन्डिङ

काठमाडौं: न्यू ईरा बचत तथा ऋण सहकारी संस्था लि.को १०औं वार्षिक साधारणसभा सम्पन्न भएको छ । संस्थाका अध्यक्ष महेन्द्रप्रसाद घोरासैनीको सभापतित्वमा र प्रदेश नं ३ का सामाजिक विकास मन्त्री युवराज दुलालको प्रमुख आतिथ्यमा साधारणसभा सम्पन्न भएको हो ।

साधारणसभाबाट आगामी कार्यकालका लागि संस्थाका अध्यक्ष घोरासैनीको अध्यक्षतामा नयाँ सञ्चालक समिति समेत गठन गरेको छ । नयाँ सञ्चालक समितिमा उपाध्यक्ष: बालानन्द न्यौपाने, सचिव: आशिष श्रेष्ठ, कोषाध्यक्ष: रोशन सापकोटा र सदस्य: रमेश कुमार गौतम, सरस्वती घोरासैनी, योगेन्द्र चौलागाई, विनु क्षेत्री र शुशिला जोशी (सेंढाई) चयन भएका छन् । त्यस्तै साधारणसभाले संस्थापक सदस्य राजन फुँयालको संयोजकत्वमा विष्णु कुमार घोरासैनी र यशोदा तिमल्सिनालाई लेखा समितिमा चयन गरेको छ ।

साधारणसभामा बोल्दै प्रमुख अतिथि मन्त्री युवाराज दुलालले सहकारीको नीति नियमको पालना गरी सहकारी सञ्चालनका लागि सहकारीले सदस्यहरुको उच्चतम् हितमा ध्यन दिनुपर्ने बताए । सभापति एवं संस्थाका अध्यक्ष घोरासैनीले सभामा अध्यक्षको प्रतिवेदन प्रस्तुत गर्दै सहकारीले सदस्यहरुको आर्थिक विकासमा सहयोग पुर्याउँदै मुलुकको समृद्धिमा एउटा ईंटा थप्ने प्रयास गरिरहेको बताए ।

सभाका अतिथि काठमाडौं जिल्ला सहकारी संघका सदस्य पुरुषोत्तम नेपालले सहकारीको भावी रणनीति र प्रगतिको लागि शुभकामना मन्तव्य दिएका थिए । संस्थाका सचिव बालानन्द न्यौपानेले सहकारीको तर्फबाट स्वागत मन्तव्य दिएका थिए । कोषाध्यक्ष रोशन सापकोटाले आ.व. ०७५।०७६ को आर्थिक प्रतिवेदन प्रस्तुत गरेका थिए भने संस्थापक सदस्य योगेन्द्र चौलागाईले कार्यक्रम सञ्चालन गरेका थिए ।