अखबार नेपाल ट्रेन्डिङ

काठमाडौं: तामाङ सांगीतिक इतिहासमा विशेष स्थान ओगटेको कालजयी गीत ‘जत्तुकु मुबा, आङीला जामे’ अब नयाँ संस्करणमा सार्वजनिक गरिएको छ । २०५४ सालमा ‘सेम’ एल्बम मार्फत पहिलो पटक सार्वजनिक भएको यस गीतको पहिलो रेकर्डमा वरिष्ठ गायक लाल बहादुर योञ्जन र वरिष्ठ गायिका इन्दिरा गोले गुरुङको आवाज रहेको थियो ।

विगतमा अत्यधिक लोकप्रिय बनेको यस गीतलाई अहिले नयाँ शैली र स्वादमा पुनः रेकर्ड गरिएको छ । शब्द लाल बहादुर योञ्जन, संगीत भरत योञ्जन र स्वर वरिष्ठ गायिका इन्दिरा गोले गुरुङ तथा दि भ्वाईस अफ नेपाल सिजन ५ का फर्स्ट रनर-अप मकर योञ्जनको रहेको छ । तामाङ समुदायको मौलिक संस्कृति, प्रेमभाव र पहिचान झल्किने गीत श्री म्यूजिकको अफिसियल युट्युब च्यानलमार्फत म्युजिक भिडियो सहित सार्वजनिक गरिएको हो ।

सुन्दर योन्जनको निर्देशनमा निर्माण भएको भिडियोमा अभिनेता कुनसाङ बम्जन र अभिनेत्री अम्बिका तामाङको अभिनय देख्न पाइन्छ । पारम्परिक तामाङ पहिरन र सांस्कृतिक दृश्यले भिडियोलाई अझ आकर्षक बनाएको छ । भिडियोको छायांकन, सम्पादन सुन्दर भोंजन, कोरियोग्राफी युद्ध लामा, र मेकअपमा छिमी तामाङको भूमिका रहेको छ । अडियो एरेन्जमेन्ट नोरबु शेर्पा, मिक्सिङ तथा मास्टरिङ सुमन खड्का, स्टुडियो पर्पल स्टुडियो र पोस्ट प्रोडक्सन श्री म्यूजिकले गरेको छ ।

मौलिकता, प्रेम र सांस्कृतिक पहिचान बोकेको यो गीत नयाँ पुस्तालाई आफ्नो सांगीतिक सम्पदा सम्झाउने प्रयासका रूपमा लिइएको छ । श्रोता तथा दर्शकबाट समेत सकारात्मक प्रतिक्रिया पाइरहेको यस गीतले तामाङ संगीतको गौरवशाली इतिहासलाई पुनर्जीवित गरेको छ ।