अखबार नेपाल ट्रेन्डिङ

काठमाडौं: ‘पहिचान र समानताको लागि प्रतिवद्धता’ भन्ने मुल नाराका साथ किराँत सुनुवार जातिको राष्ट्रिय चाड उभौली ष्याँदर पिदार ५०८४ को अवसरमा आयोजित शुभ-कामना आदानप्रदान अन्तर्क्रिया कार्यक्रम सम्पन्न भएको छ ।

सुनुवार सेवा समाज संघीय समितिको आयोजनामा आयोजित अन्तर्क्रिया कार्यक्रममा समाजका अध्यक्ष अमृत बहादुर सुनुवारको सभापतित्वमा सम्पन्न भएको हो । अन्तर्क्रिया कार्यक्रममा संघीय समितिका पूर्व अध्यक्ष एवम् सल्लाहकार मनप्रसाद सुनुवार, विदेश विभाग उपाध्यक्ष शिव सुनुवार, उपाध्यक्ष शोभा सुनुवार, महासचिव उत्तमकुमार सुनुवार कोइँचबु काःतिच लगायत सुनुवार सेवा समाजका जिल्ला अध्यक्ष तथा पदाधिकारीहरुले अन्तर्क्रियामा आ-आफ्नो भनाई राखेका थिए ।

कार्यक्रममा आफ्नो भनाई राख्ने क्रममा समाजका अध्यक्ष अमृत बहादुर सुनुवारले डिजिटल युगमा सबैले चाँडो सिक्ने र सिकाउने माध्यम भएकोले हाम्रो भाषा, संस्कृतिलाई बचाउन व्यापक रुपमा सोसल मिडिया लगायत आमसञ्चार माध्यमको प्लेटफर्मबाट फैलाउन सबैमा अनुरोध गरे ।

सुनुवार सेवा समाज काठमाडौ जिल्लाका अध्यक्ष गोपाल सुनुवारले अन्तर्क्रिया कार्यक्रमलाई शुभकामना दिँदै आजभोलि विभिन्न राजनीति दलहरुको कार्यक्रममा आफ्नो जातिय पहिचानको रुपमा प्रयोग हुँदै आएको ढोललाई दुरुपयोग भएको भन्दै यसको न्यूनिकरणका लागि बेलैमा सोच्नुपर्ने र त्यसलाई कसरी हुन्छ हटाउनुपर्नेमा जोड दिए ।

अन्तर्क्रिया कार्यक्रममा सुनुवार सेवा समाज संघीय समितिका उपाध्यक्ष शिव सुनुवारले ३६औं वार्षिक साधारणसभामा कार्यक्रमलाई सफल बनाउन सहयोगको भूमिका खेलेका स्वयंसेवकलाई धन्यवाद व्यक्त गरेका थिए । कार्यक्रममा १५ जना स्वयंसेवकलाई प्रमाणपत्र सहित सम्मान गरिएको थियो ।