अखबार नेपाल ट्रेन्डिङ

काठमाडौं: आईसिसी विश्वकप क्रिकेट लिग-२ अन्तर्गत सिरिजको पहिलो खेलमा आज नेपाल र नामिबियाबीच खेल हुँदैछ । खेल त्रिवि क्रिकेट मैदान कीर्तिपुरमा बिहान सवा ९ बजे सुरु हुनेछ ।

नामिबियाविरुद्ध जितका साथ नेपाल लिग-२ मा सुखद सुरुवात गर्ने लक्ष्यमा छ । ३ वर्षसम्म चल्ने सिरिजका शीर्ष ४ टोलीले सोझै विश्वकप छनोट खेल्न पाउने छन् । खेल २०२४ देखि २०२७ सम्म चल्नेछ । एक दिवसीय अन्तर्राष्ट्रियमा यी दुईबीच अहिलेसम्म ६ खेल हुँदा नेपालले २ र नामिबियाले ३ खेल जितेका छन् । १ खेल भने नतिजा विहिन छ । त्रिकोणात्मक सिरिजमा यी २ सहित नेदरल्याण्ड्सले पनि प्रतिस्पर्धा गर्नेछ । नेपाल र नेदरल्याण्ड्सबीच एक दिवसीयमा ३ खेल हुँदा नेपालले १ खेलमात्र जितेको छ ।

सन् २०२७ मा दक्षिण अफ्रिका, नामिबिया र जिम्बावेमा संयुक्त रुपमा हुने विश्वकपका लागि छनोट प्रक्रिया समेत रहेको लिग-२ मा कुल ८ टोलीबीच प्रतिस्पर्धा हुनेछ । यसमा नेपाल, नामिबिया, नेदरल्यान्ड्स, क्यानडा, ओमान, स्कटल्याण्ड, युएई र अमेरिका छन् । सहभागी टोलीबीच हुने २४ वटा त्रिकोणात्मक सिरिजमा कुल १४४ खेल हुनेछन् । अंक तालिकाको शीर्ष ४ टोलीले सोझै विश्वकप छनोटमा स्थान बनाउने र पुछारका ४ टोलीले प्लेअफ खेल्नुपर्नेछ ।

विश्वकप छनोटमा लिग-२ का शीर्ष ४ सहित प्लेअफका शीर्ष ४ र आईसिसीका पूर्ण सदस्य २ टोली गरि १० टोलीबीच शीर्ष ४ स्थानका लागि प्रतिस्पर्धा हुनेछ । लिग-२ का लागि नेपालले रोहित पौडेलको कप्तानीमा १५ सदस्यीय बलियो टोली घोषणा गरिसकेको छ । यस पटक ओपनर अनिल शाह र मध्यक्रमका ब्याटर देव खनालले टोलीमा पुनरागमन गर्दा रिजन ढकाल र अर्जुन साउद बाहिरिएका छन् ।

हालै सम्पन्न क्यानडाविरुद्धको सिजिर क्लिनस्विप गर्दा अनिल र देवले उत्कृष्ट प्रदर्शन गरेका थिए । त्यस्तै क्यानडासँगको सिरिजमा विश्राम पाएका अलराउन्डर दीपेन्द्रसिंह ऐरी, करण केसी र गुलशन झा पनि लिग-२ टोलीमा समावेश छन् । तर हाल युएईको फ्रेन्चाईज लिग इन्टरनेशनल लिग आईएल ट्वेन्टी ट्वेन्टीमा गल्फ जायन्टसबाट खेलिरहेका दीपेन्द्रले लिग-२ को पहिलो खेल भने गुमाउने छन् ।

यसपटक लिग-२ मा नेपालले प्रत्येक वर्ष ३-३ वटा त्रिकोणात्मक सिरिज खेल्नेछ । लिग-२ बाहेक एक दिवसीय र टि-२० सिरिज पनि तालिकामा छन् । यसअघि २०१९ देखि २०२३ सम्मको लिग-२ मा सहभागी ७ टोलीमध्ये स्कटल्याण्ड, ओमान र नेपाल शीर्ष ३ मा रहँदै सोझै विश्वकप छनोट भएका थिए ।