अखबार नेपाल ट्रेन्डिङ

एजेन्सी: लियोनेल मेस्सीले आठौं पटक विश्वकै प्रतिष्ठित बालोन डि’ओर अवार्ड जितेका छन् । फ्रान्स फुटबल म्यागजिनले हरेक वर्ष विश्वको उत्कृष्ट खेलाडीलाई दिने यो अवार्ड जितेका हुन् । यो मेस्सीको आठौं बालोन डि’ओर हो ।

यस अगाडि उनले सन् २००९ देखि लगातार २०१०, २०११, २०१२ सम्म तथा २०१५, २०१९ र २०२१ मा यो अवार्ड हात पारेका थिए । मेस्सीले म्यानचेस्टर सिटी र नर्वेका खेलाडी एर्लिङ हालान्डलाई पछि पार्दै सो अवार्ड जितेका हुन् ।

गत डिसेम्बरमा कतारमा भएको विश्वकपको उपाधि जिताउन आफ्नो देशको नेतृत्व गरेका उनले आफ्नो जीवनको महत्वाकांक्षा पूरा गर्दै बालोन डि’ओर समेत जित्न सफल भएका हुन् । उनले विश्वकप यात्रामा सात गोल गर्दै उत्कृष्ट खेलाडी उपाधि समेत हात पारेका थिए । १६औं पटक मनोनयनमा परेका मेस्सीले बालोन डि ओर अवधि भरि ३८ गोल र २५ असिस्ट गरेका थिए ।

गत सिजन मात्रै इंग्लिश प्रिमियर लिग क्लब म्यानचेस्टर सिटीमा गएका हालान्डले भने ५६ गोल गरेका थिए । गत सिजन सबैभन्दा धेरै गोल गरेका कारण उनले सोही समारोहका बीच गर्ड मुलर ट्रफी भने जितेका छन् । उनले युइएफए उत्कृष्ट वर्ष पुरुष खेलाडीको उपाधि समेत जितेका थिए ।

यस्तै महिला तर्फको बालोन डि’ ओर स्पेन र बार्सिलोनाकी खेलाडी आईटाना बोनमाटीले जितेको छिन् । बोनमाटीले समेत यस वर्ष नै अष्ट्रेलियान भएको विश्वकप जितेकी थिइन् । यसका साथै सिजनको लालिगा र च्याम्पियन्स लिग जितेको बार्सिलोनाको टोलीमा उनको महत्वपूर्ण भूमिका रहेको थियो । बोनमाटीले युइएफए उत्कृष्ट वर्ष महिला खेलाडीको उपाधि समेत जितिसकेककी थिइन् ।

इङ्ल्यान्डका युवा फरवार्ड जुड बेलिङ्घमले कोपा ट्रफी, अर्जेन्टिनाका गोलकिपर इमिलियानो मार्टिनेजले याचिन ट्रफी , रियल म्याड्रिडका ब्राजिलियन भिनिसियस जुनियरले सक्रेट्स अवार्ड जिते । महिलातर्फ बार्सिलोना र पुरुषतर्फ म्यानचेस्टर सिटी बर्षको उत्कृष्ट क्लब छानिए ।