अखबार नेपाल ट्रेन्डिङ

काठमाडौं: नेकपा एमाले लुम्बिनी प्रदेश कमिटीको अध्यक्षमा राधाकृष्ण कँडेल विजयी भएका छन् । प्रतिस्पर्धी हरि रिजाललाई दुई मतान्तर मात्रैले पराजित गर्दै प्रदेश कमिटी अध्यक्षमा कँडेल विजयी भएका हुन् ।

कँडेलले ४७९ मत प्राप्त गर्दा रिजालले ४७७ मत मात्रै प्राप्त गरेका निर्वाचन समितिले जनाएको छ । रुपन्देहीको बुटवलमा चार दिनदेखि जारी एमाले लुम्बिनी प्रदेशको प्रथम अधिवेशनमा सहमति नजुटेपछि नेतृत्व चयनको लागि मंगलबार मतदान भएको थियो ।

कँडेल र रिजाल समूह प्यानलै बनाएर निर्वाचनमा होमिएका थिए । कँडेल एमाले उपाध्यक्ष विष्णु पौडेल निकट मानिन्छन् । अध्यक्षमा पराजित हुने रिजाल एमाले महासचिव शंकर पोखरेल निकटका नेता हुन् । एमाले लुम्बिनी प्रदेश कमिटीको अध्यक्षमा आफू निकटलाई विजयी बनाउन पौडेल र पोखरेल कम्मर कसेर लागेका थिए ।

त्यसैगरी कमिटीको उपाध्यक्षमा भोजप्रसाद श्रेष्ठ ४५५ मतसहित विजयी भएका छन् । उनका निकटतम प्रतिस्पर्धी विश्वराज बरालले ३०६ मत मात्रै प्राप्त गरेका छन् ।  सचिवमा लक्ष्मण आचार्य निर्बिरोध निर्वाचित भएका छन् ।

कमिटीको उपसचिवमा पूर्ण बुढामगर ४१८ मतसहित विजयी हुँदा उनका निकटतम प्रतिस्पर्धी दुर्गाप्रसाद थारुले ३९३ मत प्राप्त गरेका छन् । महिला उपसचिवमा लीला राना मगर १ मत बढी ल्याएर विजयी भएकी छन् । मगर ३५२ मतसहित विजयी हुँदा उनकी निकटतम प्रतिस्पर्धी वसन्ती अधिकारीले ३५१ मत मात्रै प्राप्त गरेकी छन् ।