समूह उपविजेता बन्दै नेपाल सेमिफाइनलमा प्रवेश
वि.सं.२०८० भदौ २० बुधवार ११:१२
काठमाडौं: आईसीसी महिला टि-२० विश्वकप एसिया क्षेत्र छनोटमा नेपाल समूह उपविजेता बन्दै सेमिफाइनलमा प्रवेश गरेको छ ।
समूह चरणको अन्तिम खेलमा नेपाल र युएईबीचको खेल वर्षाको कारण रद्द भएपछि नेपाल समूह उपविजेता बनेको हो । वर्षाको कारण टस समेत हुन नसकेपछि नेपाल र युएईले अंक बाँडेका हुन् । दुवै टोलीले अंक बाँडेसँगै युएई समूह विजेता र नेपाल उपविजेता बन्दै अन्तिम चारमा पुगेका छन् । ५ खेलबाट समान ९ अंक भएपनि नेपाल नेट रनरेटमा पछि पर्दा समूह उपविजेता बनेको हो ।
सेमिफाइनलमा नेपालले समूह ‘बी’ को विजेतासँग शुक्रबार खेल्नेछ । समूह ‘बी’ का थाइल्याण्ड र हङकङ बीचको खेलको विजेतासँग नेपालले अब सेमिफाइनलमा खेल्नेछ । नेपालले फाइनलमा स्थान बनाउन सके ग्लोबल टि-२० विश्वकप छनोटमा स्थान पक्का गर्नेछ । समूह चरणमा नेपालले मलेसियालाई ५ रन, बहराइनलाई १० विकेट, भुटानलाई ३ विकेट र कतारलाई ९ विकेटले पराजित गरेको थियो ।
वि.सं.२०८० भदौ २० बुधवार ११:१२