अखबार नेपाल ट्रेन्डिङ

काठमाडौं: मुलुकमा यस वर्ष मनसुन अवधि (जेठ ३१ देखि भदौ ८ गतेसम्म)मा नेपालमा बाढी, पहिरो र चट्याङबाट ७३ जनाको मृत्यु भएको छ ।

मनसुन अवधिमा १०२ जना घाइते हुनका साथै २० जना बेपत्ता भएका राष्ट्रिय विपद् जोखिम न्यूनीकरण व्यवस्थापन प्राधिकरणले जनाएको छ । प्राधिकरणका कार्यकारी प्रमुख अनिल पोखरेलका अनुसार मनसुन अवधिमा मुलुकका १३५ ठाउँमा बाढी, ४२९ ठाउँमा पहिरो तथा ८३ वटा चट्याङका घटना भएका छन् ।

बाढीमा परी १२ जनाको मृत्यु, ७ जना घाइते भएका छन् भने २१ जना बेपत्ता छन् । यस्तै पहिरोमा परी ३८ जनाको मृत्यु भएको छ भने ४० घाइते भएका छन् । पहिरोमा परेर नौ बेपत्ता भएको कार्यकारी प्रमुख पोखरेलले बताए । भारी वर्षाका कारण २ जनाको ज्यान गएको छ भने चट्याङबाट २१ जनाको मृत्यु भएको छ । चट्याङ लागेर ४३ जना घाइते भएका छन् ।

यस वर्षको बाढी पहिरोबाट ३२६ दशमलव ८३ मेघावाट क्षमताका निर्माणाधीन १७ तथा सञ्चालनमा रहेका १३२ दशमलव ७५ क्षमताका १३ जलविद्युत् आयोजनामा क्षति पूगेको छ । त्यसबाट झण्डै ८ अर्ब ५० करोड रुपैयाँ बराबरको क्षति पुगेको अनुमान गरिएको छ ।

मनसुन अवधिमा भएका बाढी पहिरोका घटनाबाट देशका २९ राजमार्गका २५० ठाउँमा ४० करोड बराबरका भौतिक पूर्वाधारमा क्षति भएको तथ्याङक छ । मनसुन अवधिमा भएका बाढी पहिरोका घटनाबाट १५ अर्बभन्दा बढी भौतिक पूर्वाधार लगायतका सम्पत्तिको क्षति भएको कार्यकारी प्रमुख पोखरेलले बताए ।

मुलुकका विभिन्न स्थानमा ४ मोटरेवल पुल र २२ झोलङ्गे पुल बगाउँदा करिब  ४१ करोडको क्षति भएको छ । बाढीपहिरोका घटनाबाट २८ खानेपानी आयोजनामा क्षति हुँदा नौ करोड बराबरको नोक्सान भएको प्राधिकरणको अनुमान छ । क्षति पुगेका ती पूर्वाधार तत्काल पुनःस्थापना गर्न १० अर्ब ५५ करोडभन्दा बढी खर्च लाग्ने अनुमान गरिएको कार्यकारी प्रमुख पोखरेलले बताए ।

यस अवधिमा चट्याङ लागेर ११ स्थानमा, पहिरोबाट ७, पुल क्षतिबाट ५ र लेदोसहितको पहिरो खस्दा ८ स्थानमा गरी देशका ३१ स्थानमा सडक अवरुद्ध भएका थिए । हाल मुलुकका २३१ राजमार्गमध्ये ४८ राजमार्ग एकतर्फीरुपमा सञ्चालनमा रहेका प्राधिकरणले जनाएको छ । रासस