अखबार नेपाल ट्रेन्डिङ

काठमाडौ: वन्डर्स ग्रुप प्रा.लि.ले सञ्चालनमा ल्याएको ‘स्काई वाक’को मज्जा शुक्रबारदेखि काठमाडौंस्थित कमलादीमा लिन पाइने भएको छ । यो दक्षिण एसियाकै अग्लो स्काई वाक टावर रहेको कम्पनीको दाबी छ ।

टावरको २२औं तल्लामा रहेको स्काई वाकको मज्जा लिन सर्वसाधरणले एक हजार रुपैयाँ शुल्क तिर्नुपर्ने छ भने ८० वर्षदेखि ३ फिटसम्म उचाइ भएकालाई निशुल्क र ७० देखि ८० वर्षसम्मकालाई ५ सय रुपैयाँमा टिकट उपलब्ध गराइने कम्पनीले जनाएको छ   स्काई वाकबाट ३६० डिग्रीमा काठमाडौं उपत्यकाको दृष्य अवलोकन गर्न पाइने पनि कम्पनीले जनाएको छ ।

स्काइ वाक टावरको परियोजना १३ रोपनी २ आना जग्गामा फैलिएको छ । ७८.५ मिटर अग्लो टावरमा जमिनको सतहबाट ६५ मिटर उचाइमा सिसामा स्काई वाक गर्न सकिनेछ । सिसामाथि हिँड्ने साहसिक मज्जा लिनका लागि काठमाडौंमा यो एकमात्र गन्तव्य हुनेछ । यो परियोजना करिब २ अर्ब लगानीमा बनेको हो ।

२५ तल्लामा रहेको टावरमा २२ तलासम्म लिफ्ट चडेर र बाँकी तीन तलामा सिँढीमार्फत माथि जान सकिनेछ । दुई वटा लिफ्ट सुविधा रहेको टावरमा एक पटकमा ४५ जनाभन्दा धेरै मानिस तलमाथि गर्न सक्ने क्षमता रहेको कम्पनीले जनाएको छ ।

टावरको २५औं तला साहसिक तला हो । त्यहाँ पुगेपछि सिसा ओच्छाइएको भुइँमा हिड्न पाइन्छ भने त्यहाँ हिँड्दा खुला खाकाशमा हिँडेजस्तो अनुभव हुनेछ । साहसिक पर्यटनका पारखीहरूले यसमा मज्जा लिन सक्ने अपेक्षा गरिएको छ ।

स्काइ वाक मार्फत हेर्दा रानीपोखरी र घण्टाघर टावरको आँगनमै रहेको जस्तो भान हुनेछ । साहसिक खेल खेल्न रुचाउनेहरूका लागि थप मज्जा यस स्काई वाकले दिनेमा कम्पनी विश्वस्त रहेको छ । यहाँ एकै पटकमा ५ सय मानिस अट्ने कम्पमीले जनाएको छ ।

करिब आधा घन्टासम्म त्यहाँ रहेर काठमाडौं उपत्यका, धरहरा लगायतको सुन्दर एवम् रोमाञ्चक दृश्यावलोकन गर्न सकिनेछ । यस्तै एयरपोर्टमा जहाज उडाएको तथा जहाज ल्याण्ड गरेको दृश्यावलोकन समेत गर्न सकिनेछ ।

टावरमा हिँड्नका लागि प्रयोग गरिएको सिसा ब्रिटिस स्ट्याण्डर्डको रहेको छ भने उच्च गुणस्तरको यस सिसामा हिँड्न सुरक्षित रहेको कम्पनीले जनाएको छ । टावरको २३ र २४ औँ तलामा रेष्टुरेन्ट र क्लब रहेको छ । जहाँ एकैपटक तीन सय मानिसले सेवा लिन सक्नेछन् ।

स्काइ वाक टावरको कम्पाउण्डमा एम्फी थिएटर र फास्ट फुड रेष्टुरेन्ट रहेको छ । जहाँ शुक्रबार र शनिबार सांगीतिक कार्यक्रम गरिने कम्पनीले जनाएको छ । कम्पाउण्डमा भएको रेस्टुरेन्ट र एम्पिथिएटरमा जान भने शुल्क लाग्ने छैन ।

स्काइ वाक शुरूवाती दिनमा बिहान ८ बजेदेखि बेलुका ८ बजेसम्म सञ्चालन हुनेछ ।  यस टावरमा केही समयमा नै बञ्जी, स्विङ जस्ता अन्य साहसिक खेलहरू राख्ने तयारीमा रहेको कम्पनीले जनाएको छ ।

कम्पनीको बोर्ड अफ डाइरेक्टरमा अध्यक्ष पोखरेल सहित, तेजबहादुर सिंह, खेमराज न्यौपाने, पदम न्यौपाने, आशुतोष विक्रम सिंह र सोहन श्रेष्ठ रहेका छन् भने यस परियोजनामा करिब ५ दर्जन व्यक्तिहरूको लगानी रहेको जनाईएको छ ।

जापानमा इन्जिनियरिङ अध्ययनपछि हालको वन्डर्स ग्रुप प्रा.लि. का अध्यक्ष आकर्षण पोखरेलले नेपालमा स्काइ वाक बनाउने सोच बनाएर नेपाल आएर परियोजनाको काम अगाडि बढाइएका थिए । स्काइ वाकको डिजाइन रिपल कम्पनी र त्यहाँका इन्जिनियर किरण आचार्य र क्ले कन्सल्टेन्सीका जियोटेक इन्जिनियर उदायराज न्यौपानेले गरेका हुन् ।

यस कम्पनीका समूहले इलामको कन्याममा यसअघि नै स्काइ वाक चलाइसकेको छ भने धनकुटाको भेडेटारमा नयाँ स्काइ वाक बनाउने तयारी भइरहेको जनाएको छ । यस्तै लुक्लादेखि चेदिङसम्म ५ किलोमिटरको दूरीमा केवलकार सञ्ञ्चालन गर्न समेत यो समूहले अध्ययन गरिरहेको बताईएको छ ।