कृपया यो सदनमा महिला नेतृलाई चेली नभनियोस्: सुमना श्रेष्ठ
वि.सं.२०७९ माघ ७ शनिवार १६:०९
काठमाडौं: राष्ट्रिय स्वतन्त्र पार्टीकी सांसद सुमना श्रेष्ठले महिला सांसदलाई चेली नभन्न आग्रह गरेकी छिन् ।
उपसभामुखको निर्वाचनका लागि बसेको प्रतिनिधि सभाको बैठकमा उम्मेदवार इन्दिरा रानालाई समर्थन गर्दै उनले संसदमा महिला सांसदलाई चेली नभन्न आग्रह गरेकी हुन् ।
उनले भनिन्, ‘यो सदनमा धेरै चोटी सुनियो चेली । महिला नेतृलाई चेली भनेपछि के पुरुष नेतालाई चेला भन्छौँ ? त्यस्तो त सुनेको छैन । त्यसकारण मेरो आह्वान छ महिला नेतृलाई सम्बोधन गर्दा चेली नभनियोस् । आत्मियता नै देखाउनुछ भने ३३ प्रतिशत न्यूनतम हो । ५० प्रतिशत महिला यो संसदमा पठाइयोस् ।’
सांसद श्रेष्ठले प्रणाली र संरचनाको निर्माण तथा समयको उचित महत्वको सिकाइमा आफ्नो भूमिका रहने बताएकी छन् । अब संसद कार्यतालिका बनाएर अघि बढ्ने बताउँदै उनले भनिन्, ‘हामीले जनतालाई गरेको वाचा पूरा गर्न हामीलाई कार्यतालिका चाहिन्छ । हामीले जनताका माग पूरा गर्छौ भनेर मात्र हुँदैन कति महिनामा पूरा गर्छौँ भन्नसक्नुपर्छ ।’
राजनीतिक भागबण्डा टुंग्याउनै लामो समय लागेको बताउँदै उनले अब छिटो गरेर देशको विकासलाई प्राथमिकतामा राख्नुपर्ने बताइन् । त्यसका लागि प्रत्येक कामको समय छुट्याउनुपर्ने उनको भनाइ छ ।
उनले भनिन्, ‘हुमक, आदेश र निर्देशनले मुलुक बन्दैन् । त्यसका लागि एउटा क्यालेन्डर बनाऔँ। त्यही क्यालेन्डरको सीमा भित्र बसेर काम गरौँ । त्यति भए सदन समयसीमा भित्र बाँधिने छ । हामी जवाफदेही बन्नेछौँ । स्वमूल्यांकनको आधार बन्ने छौँ । सदनलाई आक्षेप, गालीगलौच र दोषारोपणको थलो नबनाऔँ ।’
वि.सं.२०७९ माघ ७ शनिवार १६:०९