अखबार नेपाल ट्रेन्डिङ

काठमाडौं: इलाम क्षेत्र नम्बर १ मा नेकपा एकीकृत समाजवादी पार्टीका नेता झलनाथ खनाललाई नेकपा एमालेका उम्मेदवार महेश बस्नेतले २ हजार ९५७ मतान्तरले पराजित गरेका छन् ।

अन्तिम मत परिणामको विवरण भने निर्वाचन अधिकृतको कार्यालयले सार्वजनिक गरिसकेको छैन ।

इलाम क्षेत्र नम्बर २ मा एमाले उपाध्यक्ष सुवास नेम्वाङले झिनो मतले जितिसकेको अवस्थामा १ मा पनि एमालेले जित्नेतर्फ अग्रसर भएको हो ।

सुरुदेखि नै पछि परिरहेका खनालले २१ हजार ८०२ मत ल्याए । त्यसबेला अहिले २ हजार ५०२ मतले पछि परेका थिए । तर अन्तिम परिणाम आउँदा त्यो मतान्तर बढेर तीन हजार नजिक पुगेको हो ।

आफू पछि परेपछि खनालले त्यहाँ पुन: गणना गर्नुपर्ने माग गरेका थिए । तर निर्वाचन आयोगले त्यसलाई स्वीकार गरेन ।

उनले सुरुमा ५ सय मत तलमाथि गरिएको बताएका थिए । त्यसपछि पनि उनले २६० मतमा गडबड गरिएकाले मतगणना बहिष्कार गर्ने चेतावनी दिएका थिए ।