अखबार नेपाल ट्रेन्डिङ

एजेन्सीः चिनियाँ कम्युनिष्ट पार्टीको २०औं राष्ट्रिय सम्मेलनबाट सी चिनफिङलाई ऐतिहासिक तेस्रो कार्यकालका लागि पार्टी महासचिव चुनेसँगै राष्ट्रिय सम्मेलन बेइजिङमा समापन भएको छ ।

समापन समारोहमा भने पूर्वराष्ट्रपति हु जिन्ताओलाई भने हलबाट निकालिएको भिडियो सार्वजानिक भएको छ । हु जिन्ताओ सन् २०१२ मा चिनफिङ महासचिव चुनिनुअघि चिनियाँ कम्युनिष्ट पार्टीका महासचिव र चीनका राष्ट्रपति थिए ।

७९ वर्षका उनी गत आइतबार सुरू भएको कम्युनिष्ट पार्टीको २० औं राष्ट्रिय अधिवेशनको उद्घाटनमा पनि सहभागी थिए ।

समाचार संस्था रोयटर्सका अनुसार अधिवेशनको अन्तिम दिन शनिबार ग्रेट हल अफ द पिपलमा हु जिन्ताओ सीको बाँयातिरको सिटमा बसेका थिए । त्यहीबेला दुई जना पुरूषहरू आएर उनलाई सिटबाट उठाएर लैजान्छन् ।

समाचार संस्था एएफपीले खिचेको भिडिओमा सुरूमा एक जना पुरूषले केही भनेर सिटबाट उठाउन खोज्दा जिन्ताओ उठ्न मानिरहेका हुँदैनन् । केहीबेरको प्रयासपछि उनी सिटबाट उठ्छन् । जाने बेलामा उनले सीलाई केही कुरा भन्छन् र छेऊमा बसेका प्रधानमन्त्री ली खछ्याङको काँधमा धाप मार्छन् ।

चिनियाँ कम्युनिष्ट पार्टीका पूर्वमहासचिव जिन्ताओलाई आज किन हलबाट बाहिर निकालिएको भन्नेबारे अधिकारीहरूले केही जानकारी दिएका छैनन् ।

हेर्नुहोस् भिडियो