अखबार नेपाल ट्रेन्डिङ

काठमाडौं: कञ्चनपुरमा २० वर्षीया युवतीमाथि सामूहिक बलात्कार गरेको आरोपमा एक प्रहरी जवान सहित चार जना पक्राउ परेका छन् ।

पक्राउ पर्नेहरूमा पुनर्वास नगरपालिका-९ का २४ वर्षका सुशील विष्ट, १९ वर्षका लक्ष्मण सुनार र पृथ्वी भाट क्षेत्री, २२ वर्षका प्रेमप्रसाद जैसी रहेको कञ्चनपुरका प्रहरी उपरीक्षक श्यामसिंह चौधरीले जानकारी दिए । उनका अनुसार जैसी सशस्त्र प्रहरीका जवान हुन् ।

उनीहरूले असार २३ गते राति पुनर्वास नगरपालिका-८ की युवतीमाथि सामूहिक बलात्कार गरेको प्रहरीले जनाएको छ ।

शुक्रबार प्रहरीमा जाहेरी परेपछि आरोपीहरूलाई नियन्त्रणमा लिएको एसपी चौधरीले बताए ।

प्रारम्भिक अनुसन्धानबाट ती युवती र आरोप लागेका सुशील विष्टबीच प्रेम सम्बन्ध रहेको खुलेको छ । प्रहरीको नियन्त्रणमा रहेका विष्टले युवतीसँगको आफ्नो प्रेम सम्बन्ध स्वीकार गरेको एसपी चौधरीले बताए ।

सुशीलले भागेर विवाह गर्ने भन्दै युवतीलाई मोटरसाइकलमा लगेर गएको प्रहरीले जनाएको छ । सोही क्रममा उनीहरूलाई देखेर अन्य तीनजनाले पिछा गरेका थिए । युवतीलाई चारैजनाले बलात्कार गरेको प्रहरीले जनाएको छ ।

पक्राउ परेका उनीहरूलाई इलाका प्रहरी कार्यालय त्रिभुवन वस्तीमा राखिएको छ । घटनाबारे थप अनुसन्धान जारी रहेको एसपी चौधरीले बताए ।