अखबार नेपाल ट्रेन्डिङ

काठमाडौं: जारी नेकपा माओवादी केन्द्रको ८औं महाधिवेशनको निर्वाचन कार्यतालिका फेरि परिवर्तन भएको छ ।

शनिबार तय भएको निर्वाचन कार्यतालिका पटक-पटक परिवर्तन भएकोमा आज पनि फेरि नयाँ कार्यतालिका सार्वजनिक गरिएको हो ।

नयाँ कार्यतालिका अनुसार उम्मेदवारको मनोनयन पत्र दर्ता आज दिउँसो ४ बजेदेखि ६ बजेसम्म गर्ने भनिएको छ ।

उम्मेदवारको मनोनयन पत्र दर्ता सूची प्रकाशन बेलुकी ६:३० बजे हुनेछ । ७ बजे उम्मेदवारको विरोधमा उजुरीका लागि समय छुट्याइएको छ ।

उजुरी उपार छानविन र निर्णय ७:४५ सम्म हुनेछ ।

उम्मेदवारको नामावली पुन: प्रकाशन राति ८ बजे गर्ने भनिएको छ ।

उम्मेदवारी फिर्ता लिनका लागि आधा घण्टाको समय छुट्याइएको छ ।

अन्तिम नामावली राति ८:४५ मा प्रकाशित गरिनेछ ।

आज राति ८ बजेदेखि सोमवार बिहान १:२५ सम्म मतदान हुने कार्यतालिकामा उल्लेख छ ।

मतगणना भने मतदान सम्पन्न भएको एक घण्टापछि नै सुरु गर्ने बताइएको छ ।

सहमतिका लागि कयौं प्रयास भएपनि सहमति हुननसक्दा पटकपटक निर्वाचन कार्यतालिका हेरफेर भइरहेको हो ।

यसअघि यो महाधिवेशनबाट १५ जना पदाधिकारी चयन गर्ने भनिएको थियो ।

अब भने पदाधिकारी संख्या केन्द्रीय कमिटीले आवश्यकता अनुसार निर्धारण गर्ने जनाइएको छ ।

७ प्रदेशबाट सर्वसम्मत रुपमा २५६ सदस्य छनोट गर्ने प्रयास भइरहेको छ ।

प्रदेश १ बाट ४१ जना, प्रदेश २ बाट २५ जना, वागमतीबाट ५२ जना, गण्डकीबाट २४ जना, लुम्बिनीबाट ४० जना, कर्णालीबाट ३१ जना र सुदूरपश्चिमबाट २९ जना सदस्य केन्द्रीय कमिटीमा राख्ने तयारी स्वरुप छलफल भइरहेको छ ।

प्रवास विशेष सम्पर्कबाट १४ जना केन्द्रीय कमिटीमा राख्ने गरी भागवन्डाको खाका बनेको बताइएको छ ।