अखबार नेपाल ट्रेन्डिङ

काठमाडौं: नेपाली काँग्रेसको १४औं महाधिवेशन अन्तर्गत दुई वा दुईभन्दा बढी संघीय निर्वाचन क्षेत्र भएका जिल्लाको अधिवेशन आज हुँदैछ ।

काँग्रेसको केन्द्रीय निर्वाचन समितिले दुई वा दुईभन्दा बढी संघीय निर्वाचन क्षेत्र भएका जिल्लामा आज अधिवेशन हुन लागेको जनाएको छ ।

एक मात्र निर्वाचन क्षेत्र भएका ३१ जिल्लामा अधिवेशन सकिएको छ । एउटा निर्वाचन क्षेत्र भएका धनकुटा, सोलुखुम्बु, रसुवा र दार्चुलामा जिल्ला अधिवेशन सम्पन्न हुन सकेको छैन । दार्चुला र सोलुखुम्बुमा आज अधिवेशन सम्पन्न हुने बताईएको छ ।

धनकुटामा अधिवेशन स्थगित भएको छ भने रसुवामा पालिका अधिवेशन गर्न विहीबार निर्वाचन अधिकृत खटाइएको छ । दुई वटा निर्वाचन क्षेत्र भएको हिमाली जिल्ला गोरखामा पनि काँग्रेस अधिवेशन सम्पन्न भएको छ ।

बाँकी दुई वा दुईभन्दा बढी निर्वाचन क्षेत्र भएका जिल्लामा आजबाट अधिवेशन सुरु हुन लागेको हो । प्रदेश दुईका ८ वटा जिल्लामा भने आज जिल्ला अधिवेशन सुरु हुने अवस्था छैन । सिरहामा वडा अधिवेशनसमेत सम्पन्न भएको छैन ।

अन्य जिल्लामा प्रदेश निर्वाचन क्षेत्रीय अधिवेशनको तयारी छ । यस्तै प्रदेश अधिवेशन आयोजना गरिने कैलाली र मकवानपुरमा जिल्ला अधिवेशन सर्ने भएको छ । धनुषामा पनि प्रदेश अधिवेशनअघि जिल्ला अधिवेशन सम्पन्न गर्न कठिन छ ।

यता एमालेको महाधिवेशनले चितवन काँग्रेसको जिल्ला अधिवेशन स्थगित भएको छ । मंसिर १६ र १७ गते प्रदेश अधिवेशन गर्नुपर्ने भएकाले जिल्ला अधिवेशन प्रदेश अधिवेशन हुने जिल्लाको अधिवेशन स्थगित गरिएको हो ।