अखबार नेपाल ट्रेन्डिङ

चितवनः नेकपा (एमाले)को १०औँ राष्ट्रिय महाधिवेशन आजदेखि चितवनमा सुरु हुँदैछ ।

आज चितवनस्थित नारायणी नदी तटमा हुने महाधिवेशनको उद्घाटन एमाले अध्यक्ष केपी शर्मा ओलीले मध्याह्न १२ बजे गर्ने कार्यक्रम तय भएको छ ।

महाधिवेशन उदघाटनका लागि नारायणी नदी किनारमा सजिसजाउ मञ्च देखिएको छ । बिहानैदेखि देशको विभिन्न स्थानबाट  महाधिवेशनमा सहभागी आउन चितवनको नारायणी किनार आउन थालेका छन् ।

सहभागी हुन आउनेहरुको गाडी चितवन पारस बसपार्कमा नै रोक्न लगाइएको छ । बिहानैबाट पारस बसपार्कबाट नारायणी किनारसम्म हिँडेर जानेहरु लर्को लागेको छ । अहिले चितवनमा भिडभाड र जाम बढेको छ ।

एमाले विभाजन पश्चात पहिलो पटक महाधिवेशन हुन लागेको हो ।

उद्घाटन कार्यक्रममा प्रधानमन्त्री एवं नेपाली कांग्रेस सभापति शेरबहादुर देउवालगायत सात पार्टीका प्रमुख नेता सहभागी हुने छन् ।

जसपाका अध्यक्ष उपेन्द्र यादव, लोसपाका अध्यक्ष महन्थ ठाकुर, राप्रपा अध्यक्ष कमल थापा, राजमोबाट चित्रबहादुर केसी र नेमकिपाका नेतासमेत सहभागी हुनेछन् ।

महाधिवेशनका लागि भारत, बंगलादेश, श्रीलंका, कम्बोडियालगायत १५ देशका अतिथि र अन्य २५ देशबाट शुभकामना सन्देश प्राप्त भएको छ ।

बन्दसत्र सौराहामा हुनेछ । १२ मंसिरसम्म चल्ने महाधिवेशनले नयाँ नेतृत्व चयन गर्नेछ ।

महाधिवेशनमा २ हजार १ सय ७५ प्रतिनिधि र १ सय २९ पर्यवेक्षक सहभागी हुनेछन् ।

प्रतिनिधिमध्ये ६ सय २७ जना महिला र २ सय ९ जना दलित-उत्पीडित समूहबाट प्रतिनिधित्व हुनेछन् ।