अखबार नेपाल ट्रेन्डिङ

काठमाडौंः नेपाली महिला राष्ट्रिय टोली हङकङसँग गोलरहित बराबरीमा रोकिएपछि एसियन कप–२०२२ छनोटको यात्रा समाप्त भएको छ ।

जित निकाल्नै पर्ने खेलमा हङकङको महिला राष्ट्रिय टोलीसँग गोलरहित बराबरीमा रोकिएपछि नेपालको छनोट हुने सम्भावना टुंगिएको हो ।

उज्वेकिस्तानस्थित (जेएआर एसओके) माजमुएसी स्टेडियममा मंगलबार भएको खेलमा बल पोसेसन राख्दै हङकङलाई दबाबमा राखे पनि फिनिसिङमा चुक्दा नेपाल बराबरीमा रोकिन बाध्य बन्यो ।

नेपालले यसभन्दा तीनपटक एसियन कप खेलिसकेको छ ।

चौथोपटक एसियन कप तथा विश्वकप छनोटमा अघि बढ्ने सम्भावना पनि यो बराबरीसँगै समाप्त भएको छ ।

यसअघि नेपालले छनोटको पहिलो खेलमा फिलिपिन्ससँग सुरुवाती अग्रता लिनुका बाबजुत अन्तिम दुई मिनेट सम्हालिन नसक्दा २–१ को हार बेहोर्न पुगेको थियो ।

हङकङसँगको बराबरीसँगै समूह एफमा नेपालले २ खेलमा १ अंक जोड्यो ।

हङकङसँग गोलरहित बराबरीले एसियन कप–२०२२ छनोटमा नेपाल पुछारमा रह्यो ।

दोस्रो स्थानको हङकङको भने छनोट हुने सम्भावना कायम रहेको छ ।

हङकङले अब अन्तिम खेलमा फिलिपिन्ससँग खेल्नेछ ।

हङकङले १ खेलमा १ अंक जोडेको छ ।

शीर्ष स्थानको फिलिपिन्सले १ खेलमा ३ अंक जोडेको छ ।

यस समूहको शीर्ष टोलीले अर्को वर्ष भारतमा हुने एसियन कप खेल्नेछ ।

एसियन कप जनवरी २० देखि फेब्रुअरी ६ सम्म हुनेछ ।

नेपालले ओमानसँग मैत्रीपूर्ण खेल खेल्ने

नेपाली पुरुष राष्ट्रिय फुटबल टोलीले ओमानसँग मैत्रीपूर्ण खेल खेल्ने भएको छ ।

अखिल नेपाल फुटबल संघ (एन्फा)ले नेपाली टोलीले कतारमा ओमानसँग मैत्रीपूर्ण खेल खेल्ने जनाएको छ ।

नेपाल र ओमानबीचको खेल आइतबार कतार युनिभर्सिटी मैदानमा हुनेछ ।

साफ च्याम्पियनसिपको तयारीका लागि नेपालले ओमानसँग मैत्रीपूर्ण खेल्न लागेको हो ।

साफको तयारीका लागि नेपाली टोली दुुई सातादेखि कतारमा रहेका छन् ।

कतारमा विशेष प्रशिक्षमा जानुअघि नेपालले घरेलु मैदानमा भारतसँग दुई मैत्रीपूर्ण खेल खेलेको थियो ।

यो पनि पढ्नु होस्ः

स्पानिस ला लिगामा लुइस सुआरेज चम्किदा एट्लेटिको मड्रिड विजय