अखबार नेपाल ट्रेन्डिङ

काठमाडौं: इजरायलका दीर्घकालीन स्याहार केन्द्रमा रोजगारीका लागि जाने श्रमिक छनोट गर्न आज भाषा परीक्षा हुँदै छ ।

दिउँसो १ बजेबाट एक घण्टा हुने परीक्षामा ७ हजार ९ जना सहभागी हुन पाउने छन् । यसको रिजल्ट(परीक्षाफल) २ दिनभित्रै निकालिसक्ने बताइएको छ ।

आकर्षक श्रम गन्तव्यका रूपमा हेरिएको इजरायलको परीक्षाका लागि ९ हजार ६ सय ९९ जनाको आवेदन परेको थियो । त्यसमध्ये ७ हजार ९ जना परीक्षामा सामेल हुँदै छन् ।

७ हजार ९ जनामध्येबाट पनि १६ सय जनालाई रोस्टरमा पठाइने छ भने त्यसमध्येबाट पनि मौखिकबाट छनौट गरी १४ सय जनाको रिजल्र्ट विभागले इजरायल पठाउने छ ।

इजरायलले लिखित र मौखिक परीक्षामा पास भएका तिनै १४ सय जनाबाट उत्कृष्ट १ हजार जनालाई छनौट गर्ने छ । त्यसमा ७० प्रतिशत महिला र ३० प्रतिशत पुरुष हुने छन् ।

विभागका अनुसार आजको लिखित परीक्षा पास गरेपछि विभागले मौखिक गर्छ । अंग्रेजी भाषाको परीक्षा ८० पूर्णाङ्कको हुनेछ भने २० पूर्णाङ्कको अन्तर्वार्ता अर्थात् मौखिक हुन्छ ।

पास हुनको लागि ८० पूर्णाङ्कमा ५० प्रतिशत ल्याउनु पर्छ अर्थात् ४० नम्बर ल्याउनु पर्ने हुन्छ ।

परीक्षा काठमाडौंका विभिन्न विद्यालय तथा कलेजहरुमा ११ वटा स्थानमा १६ वटा केन्द्रहरु तोकिएको छ ।