अखबार नेपाल ट्रेन्डिङ

काठमाडौं: नेपालको चर्चित रियालिटी शो नेपाल आइडलको चौथो सिजन प्रसारण हुने भएको छ ।

एपीवान टेलिभिजनबाट प्रशारण भईरहेको उक्त शो केही समयदेखि बन्द रहेको थियो ।

नेपाल आइडलका हेड निर्देशक सुरेश पौडेलले नेपाल आइडल अब नयाँ प्रतिभाको खोजी  गर्दै पुनः प्रसारणमा आउने जानकारी गराएका छन् ।

पौडेल भने- ‘फ्रेन्चाइजको अनुमति ३ वर्षको थियो । त्यो सकिएपछि चौथो गर्ने वा नगर्ने दुबिधा थियो । अहिले फ्रेन्चाइजको मौखिक अनुमति पाइसकेका छौँ । लिखित अनुमति प्राप्त भएपछि हामी चौथो सिजनको काममा लाग्नेछौँ ।’

शो का लागि केही दिनमा नै लिखित अनुमति पत्र प्राप्त हुनासाथ चौथो सिजनको प्रोमो सार्वजनिक गर्ने समेत पौडेलले बताए ।

यस पटकको शोमा भने निर्णायकहरु फेरिने भएको छ । फ्रेन्चाइज गायन रियालिटी शो रहेको ‘आइडल’ पहिलो सिजनबाट नै चर्चामा आउनुका साथै यस रियालिटी शोलाई  दर्शकले अत्यधिक रुचाएका थिए ।

शो को सुरुदेखि तेस्रो सिजनसम्म गायिका इन्दिरा जोशी, गायक तथा संगीतकार कालीप्रसाद बास्कोटा, संगीतकार न्ह्यु बज्रचार्य निर्णायकको रुपमा थिए ।

हालसम्म नेपाल आईडलको उपाधि क्रमशः पहिलो सिजनमा बुद्ध लामा दोस्रो सिजनमा रवि ओड र तेस्रो सिजनमा सज्जा चौलागाईले जितेका छन् ।