अखबार नेपाल ट्रेन्डिङ

एजेन्सीः युनिसेफका कार्यकारी निर्देशक हेनेरिएटा फोरले कोभिड विरुद्ध लड्न सबैले आशाको दियो बाल्नुपर्ने बताइन् । संयुक्त राष्ट्रसंघीय महासभाको कोभिड–१९ सम्बन्धी विशेष सत्रमा सम्बोधनका क्रममा कार्यकारी निर्देशक फोरले कोभिड–१९ महामारी नयाँ चरणमा प्रवेश गरेपनि सबैले आशाको दियो बल्नुपर्ने बताउनुभएको हो ।
सम्बोधनका क्रममा फोरले आफ्नो जीवनकालमा देखेका संकटहरुमध्ये कोरोना महामारी एउटा वास्तविक संकटको रूपमा देखा परेको बताइन् । विश्वको जुनसुकै कुनामा बसोबास गर्ने भएतापनि हामी सबैलाई प्रभावित पारिरहेकोले सबै एकजुट हुनुपर्ने उनको धारणा थियो ।

कोभिड–१९ विरुद्वको खोपमा न्युन तथा निम्न मध्यम आय भएका देशहरूको पहुँच सुनिश्चित गर्न युनिसेफ कोभ्याक्स फसिलिटीको अग्रिम बजार प्रतिवद्वतामा आवद्व भएको कार्यकारी निर्देशक फोरले बताइन् । खोप उपलब्ध हुने समयमा कुनै पनि देश नछुटुन भनि सुनिश्चित गर्नको लागि लागिपरेको दाबी उनको छ ।

युनिसेफ झन्डै १०० वटा देशमा नियमित खोप कार्यक्रम तथा प्रकोपको समयमा दिनको लागि हरेक वर्ष २ अर्ब खोप खरिद गर्ने विश्वकै सबै भन्दा ठुलो खोप खरिदकर्ता हो । युनिसेफले खरिद कार्यको समन्वय एवं सहयोग, अन्तर्राष्ट्रिय ढुवानी र राष्ट्रिय स्तरमा गरिने वितरण कार्यमा कोभ्याक्स फसिलिटिलाई सहयोग गरिरहेको छ ।