अखबार नेपाल ट्रेन्डिङ

कविता गाउमै छ साइला
गाउँमै छ सुसज्जित दुलही र उग्रचण्डी काली
तिमीलाई इश्वरप्रती विश्वास भए इश्वर पनि गाउँमै छ
खेत खलियान जीवन गाउँमै त छ ।

तिमीले फेरिरहेको श्वास
मैले पठाएको हुँ वतासको साथ लाएर
हरेक बिहान उदाउने घामको उज्यालो
यतै गाउँको स्पर्श बोकेर पुगेको हो तिमीसम्म ।
केही नभए जस्तो लागे पनि
सबथोक गाउँमै त छ साइला ।

गाउँमै छ हृदयस्पर्शी कथाहरु
कथाभित्रका यथार्थहरु बोकेर
हरेक बिहान मुस्कुराउँछ गाउँ
चिरबिराउछन् चराहरु, सुसेल्छन् ठिटाहरु ।

गाउँमै छ चरम आनन्द
थकान बिसाउन रोधी गाउने गाउँमै हो
च्याब्रुङको तालमा पिरती लाउने गाउँमै हो
चराहरुको लय टिपेर बुनेको सिलोक गाउँमै छ साइला ।

गाउँमै छ तिमीले भन्दै हिँडेको पहिचान
तिमीले गाउँदै हिँडेको सभ्यता
तिमी गाउँ फर्क साइला
गाउँमै छ स्वाभिमानको पहाड ।

गाउँमै हो पधेँरामा ठिटीहरु खित्काउने
चराहरुले बचेरा कोरल्ने
गाउँमै त हो गुराँससङ्गै कयौं जोवान फुल्ने
हो साइला गाउमै छ जीवनको इन्द्रेणी ।

गाउँमै छ साइला
तिमीले लेख्ने कविताका तहतह पङ्तिहरु
गीतको स्थायी र अन्तरा
उपन्यासका अध्यायहरु
गाउँमै छ तिमीले बोल्ने भाषा
मादलको धिन्ताङ र मालश्रीको भाका
सोइ ढोले सोइ साकेलाको सिली
दुखमा तिमीसँगै रोइदिने पहाड,नदी, रुख, चरा, जीवहरु
सुखमा तिमीसङ्गै मुस्कुराउने फूल, जुन, बतास
यी सप्पै गाउँमै त छ
मिठो जीवनगीत गाउँमै छ साइला ।

कति उचाल्छौ थेग्न नसक्ने भारी ?
कति नापिरहन्छौ टेक्न नसक्ने भुइँ ?
भो उतै छोडेर आउ उराठ यी कहरहरु
गाउँ फर्केर आउ साइला
बाहिर निकाल्नु छ केटाकेटीहरुलाई
टेलिभिजन र युटुबको बन्द कोठाबाट
सिकाउनु छ भित्ते, खुट्टे, गिर र डन्डीबियो
गाउनुछ कोक्पाहरुसँगै सिलोक
बजाउनु छ बिनायो
जीवनको मीठो लय गाउँमै छ साइला ।