अखबार नेपाल ट्रेन्डिङ

एजेन्सीः स्पेनिस ला लिगा फुटबलमा बार्सिलोनाले फराकिलो जित निकालेको छ । आईतबार राति बार्सिलोनाले भिया रियललाई ४-१ ले हराउँदै उपाधिको आशा कायमै राखेको छ ।

पाउ टोरेसको आत्मघाति गोलसँगै बार्सिलोनाले तेस्रो मिनेटमा अग्रता बनाएका थियो । जेरार्ड मोरिनोले १३औं मिनेटमा घरेलु टोलीका लागि बराबरी गोल फर्काएका थिए । लुईस स्वारेजले २०औं मिनेटमा पुन बार्सिलोनालाई अग्रता दिलाए । पहिलो हाफको अन्तिम मिनेटमा एन्टोनी ग्रिजम्यानले बार्सिलोनालाई ३–१ ले अघि बढाए । खेल सकिन चार मिनेट बाँकी छँदा अंशु फातीले गोल गर्दै बार्सिलोनाको जित सुनिश्चित गरेका थिए ।

बार्सिलोनाको फरवार्ड लाईनमा देखिएका मेस्सी, स्वारेज र ग्रिजम्यानको प्रर्दशन प्रभावशाली देखिएको थियो । बार्सिलोनाले शीर्ष स्थानको रियलसँगको दुरी चार अंकमा झारेको छ । जितसँगै बार्सिलोनाले उपाधिको झिनो सम्भावना बाँकी राखेको छ ।

भिया रियलले कोरोनापछि सुरु भएको लिगमा पाँचमा जित र एकमा बराबरीको नतिजा निकालेको थियो । क्लब ५४ अंक सहित तालिकाको पाँचौ स्थानमा छ । पछिल्लो हारले च्याम्पियन्स लिगको दौडमा रहेको क्लबलाई घाटा लागेको छ ।