अखबार नेपाल ट्रेन्डिङ

काठमाडौं: सत्तारुढ नेपाल कम्युनिष्ट पार्टी नेकपाको स्थायी कमिटी बैठक फेरि पनि स्थगित भएको छ । प्रधानमन्त्री तथा नेकपाका अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डबीच कुरा नमिलेपछि स्थायी कमिटी बैठक स्थगित गरिएको हो ।

शनिबार बिहान ११ बजे बोलाइएको बैठक असार २२ गतेसम्मका लागि स्थगित गरिएको प्रधानमन्त्री ओलीका प्रेस सल्लाहकार सुर्य थापाले जानकारी दिए । उनका अनुसार दुई अध्यक्षबीचमा सहमति भएपछि मात्रै बैठक बस्ने जानकारी दिएका छन् ।

यसअघि मंगलबार बसेको बैठकमा चर्काचर्की बढेको थियो । बुधबार पनि चर्काचर्की भएपछि बैठक आज शनिबारका लागि सारिएको थियो । तर दुई अध्यक्षबीचमा सहमति नभएपछि स्थायी कमिटी बैठक थप दुई दिन पर सारिएको हो । पुष्पकमल दाहाल लगायतका नेताहरुले पार्टी र सरकार सञ्चालनमा ओली असफल भएको भन्दै राजीनामा माग गरेका छन । तर ओलीले राजीनामा नदिने बरु पार्टी फुटाउनै परे तयार हुने भनेपछि कुरा नमिलेको हो ।